Með samvinnu erum við #1 í þjónustu

Góð þjónusta breytir öllu

Mikilvægi þjónustuupplifunar og áhersla á góða þjónustu hefur aldrei verið eins mikil og nú á tímum stafrænna umbreytinga í bankaþjónustu. Einstaklingar kjósa í auknu mæli að sinna sínum daglegu bankaviðskiptum utan hefðbundinna opnunartíma, eða á tímum sem hentar þeirra lífstíl hvað best. Það er því mikilvægt fyrir banka líkt og okkar sem er í stöðugri framþróun að við hönnum okkar vöruborð og þjónustur með þeim hætti að þær mæti þörfum viðskiptavina okkar á þeim tímamótum sem þeir eru hverju sinni. Áhersla hefur verið lögð á fræðslu og aðgengi að góðum upplýsingum sem og góðum upplýsingaveitum líkt og spjallmenninu Fróða. Mikil eftirspurn hefur verið eftir húsnæðislánum á nýliðnu starfsári og hefur það reynst okkur heillavænlegt hversu vel hefur tekist í stafrænni þróun þeirrar þjónustu en það hefur leitt til þess að ánægja viðskiptavina sem endurfjármögnuðu eða tóku hjá okkur húsnæðislán á síðasta ári er mjög há eða um 90% ánægja. Nýju ári fylgja ný tækifæri til að gera góða þjónustu enn betri. 

Íslensk fyrirtæki vel undirbúin fyrir kröftuga viðspyrnu

Árið 2021 einkenndist sannarlega á áframhaldandi áhrifum og áskorunum COVID-19 heimsfaraldurs, en árið einkenndist líka af kröftugri viðspyrnu íslensk atvinnulífs ekki síst ferðaþjónustunnar með komu ferðamanna til Íslands á ný og almennt innlendrar eftirspurnar. Við fundum fljótt á árinu fyrir vaxandi eftirspurn nýrra útlána og náðu þau methæðum hjá okkur á árinu, en um leið voru uppgreiðslur og veltuhraði lána meiri, sem skilaði sér í hóflegum vexti lánasafnsins. Þá hafa innlán lítilla og meðalstórra fyrirtækja vaxið umfram hefðbundin ár og langt umfram áætlanir þessa árs og má merkja vöxt í öllum atvinnugreinum. Það var ánægjulegt að sjá niðurstöður úr Fyrirtækjavagni Gallups í lok árs sem staðfestir enn hæstu markaðshlutdeild og ánægju viðskiptavina á markaði.Íslensk fyrirtæki hafa sýnt og sannað í gegnum þennan heimsfaraldur að þau voru flest öll velundirbúin undir slíkar efnahagssveiflur. Úrræði ríkisstjórnarinnar spiluðu einnig stórt hlutverk við að ráða við vandann.Við merkjum bjartsýni meðal lítilla og meðalstórra fyrirtækja sem eru óðum að vinna sig út úr áhrifum heimsfaraldursins, þrátt fyrir að ekki sé öll óvissa úti.

Góður árangur og aukin umsvif

Allar deildir innan Fyrirtækja- og fjárfestasviðs náðu framúrskarandi árangri á árinu 2021. Vel gekk að aðstoða viðskiptavini við að sækja fjármögnun, bæði í gegnum útgáfu á skuldabréfamarkaði og með nýjum útlánum sem námu 87 milljörðum króna á árinu. Stór skref voru stigin á sviði sjálfbærni með veitingu fyrsta græna framkvæmdalánsins og hafist var handa við að greina kolefnisspor lánasafnsins. 

Fyrirtækjaráðgjöf og Verðbréfamiðlun léku stórt hlutverk við sölu og skráningu Íslandsbanka í kauphöll og Fyrirtækjaráðgjöf veitti ráðgjöf í tengslum við sölu á fjarskiptafyrirtækinu Mílu, sem er stærsta erlenda fjárfesting hér á landi um árabil. Mikill vöxtur var hjá Einkabanka- og fagfjárfestaþjónustu og nam nettó aukning á eignum í stýringu 19 milljörðum króna á árinu. Gjaldeyrismiðlun og Afleiðuborð áttu metár og við sjáum fram á vaxandi umsvif í gjaldeyrisvörnum á komandi misserum. Verðbréfamiðlun var leiðandi í miðlun með skuldabréf og hlutabréfamiðlun átti metár samfara auknum umsvifum á markaði. Við búum að mikilli reynslu og krafti í okkar starfsfólki og ánægja viðskiptavina með okkar þjónustu hefur aldrei mælst meiri.  

Góð ávöxtun sjóða og aukið aðgengi að sjóðum er jákvætt fyrir sparifjáreigendur

Sparnaður hefur aukist verulega í heimsfaraldrinum. Innlán íslenskra heimila jukust um tæplega 170 milljarða eða yfir 17% á milli áranna 2019 og 2021. Þá fjölgaði hluthöfum í Kauphöllinni úr um 8.300 í lok árs 2019 í um 31.000 í lok árs 2021 og hafa hlutabréfasjóðir landsins ríflega tvöfaldast síðan í byrjun árs 2020. Þetta er einstaklega jákvæð þróun þar sem sparnaður veitir ákveðið öryggi á óvissutímum. Sjóðstjórar Íslandssjóða hafa skilað afbragðs verki og var sjóðurinn IS EQUUS Hlutabréf með hæstu ávöxtun allra íslenskra sjóða árið 2021. Það er ánægjulegt að sjá að samfara góðri ávöxtun á sjóðamarkaði hafi aðgengi  að sjóðum verið bætt til muna en Íslandsbanki var nú í sumar fyrsti bankinn til að bjóða upp á viðskipti með sjóði í Íslandsbanka-appinu sem hefur slegið í gegn, ekki síst hjá ungum sparifjáreigendum.

Sameinaðir söluferlar fela í sér tækifæri fyrir vöxt í framtíðinni

Stafræn bankaþjónusta er nú orðin viðtekin, en áskorun framtíðarinnar felst í því að skapa sameiginlega umgjörð sem brúar bilið á milli hefðbundinna rafrænna viðskipta og bankaþjónustu. Árið 2021 fjárfesti Íslandsbanki í samþættri stafrænni sölupípu sem mun veita aðgang að söluferlum fyrir vörur bankans og ytri samstarfsaðila frá upphafi til enda. Þannig verður tryggt að bankinn verði tilbúinn að nýta öll tækifæri sem bjóðast við innleiðingu PSD2 tilskipunarinnar um greiðsluþjónustu. Þar að auki hefur áherslan 2021 á endurnýjun lánakerfis  og áframhaldandi vegferð okkar við hagnýtingu gagna, skapað okkur grundvöll fyrir sérsniðna þjónustu og vöruframboð. Lykilatriði í aðgreiningu á íslenskum markaði er aðgangur að hæfileikum til að nýta til fulls þau tækifæri sem fjárfesting okkar í tækni á undanförnum árum felur í sér. Stofnun tækniþróunarseturs Íslandsbanka er ákveðið skref til að skapa tækniteymi á heimsmælikvarða

Eldmóður í áhættustýringu

Íslandsbanki býr að langri hefð í fjármögnun íslenskra heimila og fyrirtækja. Útlánaáhætta er ríkjandi áhættuþáttur í starfsemi bankans og vegur um 90% af áhættugrunni. Því er lögð sérstök rækt við útlánamenningu bankans með því að draga lærdóm af reynslunni, með sterkum og áhættumeðvituðum tóni að ofan, með ótvíræðum útlánaheimildum og umgjörð ákvarðanatöku þar sem ólíkum sjónarmiðum og opnum samskiptum er fagnað. 

Aðferðir áhættustýringar eru í stöðugri þróun til mæta breytingum í rekstrarumhverfi og til að nýta nýja möguleika sem skapast með bættri tækni. Íslandsbanki er vel í stakk búinn til að hafa eftirlit með og stýra bæði hefðbundnum og nýjum áhættum.

Fjármál og fjármögnun

Farsælt ár og góð afkoma

Árið 2021 var farsælt fyrir Íslandsbanka þar sem afkoma var með ágætum og reksturinn var góður. Arðsemi var 12,3% á árinu sem er umfram fjárhagsleg markmið bankans. Tekjumyndunin var sérstaklega góð með 16,3% aukningu á árinu 2021 þar sem vöxtur varhjá öllum tekjusviðum. Kostnaðaraðhald hélt áfram og kostnaðarhlutfallið lækkar á milli ára. Mikill vöxtur í húsnæðislánum stuðlaði að 7,9% hækkun útlána og þá jukust innlán um 9,5%. Bankinn gaf út sitt fyrsta víkjandi skuldabréf eiginfjárþáttar 1  að fjárhæð 750 milljónir sænskra króna. Töluverð umframeftirspurn var eftir útgáfunni sem var seld til fjárfesta í Skandinavíu, Frakklandi og Sviss. Bankinn er vel fjármagnaður og eru öll lausafjár- og eiginfjárhlutföll yfir markmiðum og kröfum eftirlitsaðila. Stjórn bankans mun því leggja til á aðalfundi að greiddir verði 11,9 milljarðar króna í arð og mun leitast eftir samþykki til að kaupa til baka 15 milljarða af eigin bréfum á næstu mánuðum.