Hvað er tilgreind séreign?

Þegar þú vinnur fer hluti af launum þínum í lífeyrissparnað, það er lögbundið og nemur 15,5% af launum þínum. Þú greiðir 4% og vinnuveitandinn þinn 11,5%.

Af þessum 15,5% geturðu valið að láta allt að 3,5% fara í tilgreinda séreign, þ.e. í þinn eigin séreignarsparnað, í staðinn fyrir að fara í sameiginlegan sjóð (samtryggingu).

Af hverju skiptir þetta máli?

Þú gætir nú þegar hafa byggt upp traustan ævilangan lífeyri hjá skyldulífeyrissjóðnum þínum. Þá getur verið skynsamlegt að auka sveigjanleikann til framtíðar. Tilgreind séreign er þín eign. Hún erfist, hún er laus eftir 62 ára aldur og er varin fyrir fjárnámi ef eitthvað kemur upp á.

Líkt og með annan séreignarsparnað ákveður þú hvernig þú ráðstafar tilgreindri séreign og hvaða vörsluaðili hentar þér best.

Þú gerir samning við okkur og hefur síðan samband við skyldulífeyrissjóðinn þinn til að óska eftir því að 3,5% iðgjaldsins fari til okkar.