Við trúum á góðar hugmyndir
Styrkir úr Frumkvöðlasjóði Íslandsbanka eru veittir einu sinni á ári. Umsóknarfrestur er frá 7. september til og með 4. október 2026.
Hreyfiafl til góðra verka
Við viljum vera hreyfiafl til góðra verka í samfélaginu og styðja við sjálfbæra þróun í samfélaginu. Við veitum styrki til verkefna sem styðja heimsmarkmið Sameinuðu þjóðanna en með því hvetjum við til sjálfbærrar nýsköpunar. Hægt er að sækja um styrk á bilinu 500.000 - 5.000.000 kr. Úthlutunarreglurnar eru aðgengilegar hér og eru umsækjendur hvattir til að kynna sér vel almenn skilyrði sjóðsins.
Markmið sjóðsins
Markmið sjóðsins er að hvetja til nýsköpunar og þróunar og styðja við bakið á frumkvöðlaverkefnum sem stuðla að heimsmarkmiðum Sameinuðu þjóðanna. Íslandsbanki greiðir 0,1% mótframlag í sjóðinn af innistæðu Vaxtasprota sparnaðarreikningum á ársgrundvelli.
Stjórn sjóðsins
Stjórn sjóðsins er tilnefnd af bankastjóra Íslandsbanka og ber ábyrgð á að móta og taka ákvörðun um fjárfestingastefnu sjóðsins.
Sjóðsstjórn úthlutar fé úr sjóðnum til verkefna og auglýsir eftir umsóknum samkvæmt úthlutunarreglum.
Fyrirspurnir sendist á netfangið: frumkvodlasjodur@islandsbanki.is.
Styrkir úr Frumkvöðlasjóði Íslandsbanka
Styrkir úr Frumkvöðlasjóði Íslandsbanka eru veittir einu sinni á ári. Umsóknarfrestur er frá 7. september til og með 4. október 2026. Stjórn sjóðsins hefur skipað KLAK – Icelandic Startups sem úthlutunarnefnd. Þannig nýtum við víðtæka reynslu KLAK af nýsköpun, uppbyggingu sprotafyrirtækja og mati á verkefnum á fyrstu stigum. Úthlutunarnefndin fer svo yfir allar umsóknir með hliðsjón af viðmiðum sjóðsins og leggur tillögur fyrir stjórnina, sem tekur endanlega ákvörðun.
Davíð Símonarson
Stofnandi og fræmkvæmdastjóri Smitten
Davíð Símonarson er stofnandi og fræmkvæmdastjóri Smitten, vinsælasta stefnumótaapps Íslands, sem hefur vaxið hratt síðustu ár bæði hérlendis og erlendis. Hann hefur leitt yfir 10 fjármögnunarumferðir fyrir eigin fyrirtæki og aflað þeim fjárfestinga upp á marga milljarða króna.
Davíð er menntaður iðnaðarverkfræðingur og hefur á síðustu árum byggt upp víðtæka reynslu af uppbyggingu sprotafyrirtækja, fjármögnunum og vexti tæknifyrirtækja. Auk þess að leiða eigin fyrirtæki hefur hann aðstoðað fjölda íslenskra og erlendra sprotafyrirtækja við fjárfestatengsl og fjármögnun og fjárfest sjálfur í nokkrum sprotum.
Hann hefur verið viðskiptavinur Íslandsbanka allt sitt líf og hefur mikinn áhuga á að styðja við íslenskt frumkvöðlaumhverfi og gefa til baka til samfélagsins.
Ragnheiður H. Magnúsdóttir
Stofnandi englafjárfestingafélagsins Nordic Ignite og ráðgjafi hjá Möggum
Ragnheiður H. Magnúsdóttir er fjárfestir, ráðgjafi og stjórnarmaður með víðtæka reynslu af nýsköpun, stafrænni umbreytingu og uppbyggingu fyrirtækja. Hún hefur gegnt stjórnunarstörfum hjá meðal annars Símanum, Hugsmiðjunni, Marel og Veitum og starfar í dag sem einn af stofnendum og fjárfestingarstjóri Nordic Ignite, sem fjárfestir í norrænum sprotafyrirtækjum. Ragnheiður situr í stjórnum fjölmargra fyrirtækja og stofnana og hefur áður setið í stjórn Tækniþróunarsjóðs og verið formaður tækninefndar Vísinda- og tækniráðs.
Una Steinsdóttir
Framkvæmdastjóri Viðskiptabankasviðs Íslandsbanka
Una Steinsdóttir er Framkvæmdastjóri Fyrirtækjasviðs Íslandsbanka og býr yfir rúmlega þriggja áratuga reynslu úr íslensku fjármála- og viðskiptaumhverfi. Hún hefur gegnt fjölmörgum lykilstöðum hjá Íslandsbanka og forverum hans frá árinu 1991, þar á meðal sem framkvæmdastjóri viðskiptabankasviðs, framkvæmdastjóri útibúasviðs og útibússtjóri í Reykjanesbæ.
Í gegnum starfsferil sinn hefur Una komið að uppbyggingu og þróun öflugrar fyrirtækjaþjónustu. Hún hefur í gegnum fjölmörg viðskiptasambönd komið að þjónustu og fjármögnun fjölbreyttra fyrirtæki um allt land og hefur því öðlast víðtækan skilning á þörfum fyrirtækja á ólíkum vaxtarstigum.
Una er með Cand.Oecon.-gráðu í viðskiptafræði frá Háskóla Íslands og lauk AMP stjórnendanámi við IESE Business School í Barcelona árið 2015. Hún hefur mikinn áhuga á nýsköpun, verðmætasköpun og uppbyggingu öflugs frumkvöðlaumhverfis á Íslandi og vill styðja við næstu kynslóð frumkvöðla og fyrirtækja í vexti.