Heimilin straujuðu greiðslukort sín fyrir rúmlega 152 milljarða í júlí samkvæmt nýbirtum tölum frá Seðlabankanum. Kortavelta jókst um 5,6% í krónum talið miðað við sama mánuð í fyrra en að teknu tilliti til verðlags- og gengisbreytinga jókst hún einungis um 0,4%. Undanfarna mánuði hefur verið að hægja á raunvexti kortaveltu, að júní undanskildum. Svo virðist sem neyslugleði heimilanna sé smám saman að gefa eftir í kjölfarið á kröftugum vexti síðustu ára.
Merki um hægari vöxt einkaneyslu
Kortavelta jókst lítillega að raunvirði í júlí miðað við sama mánuð í fyrra. Undanfarið hefur hægt á raunvexti kortaveltu, sem bendir til þess að þróttur einkaneyslu sé minni en áður. Sú þróun rímar við vísbendingar um vaxandi slaka í hagkerfinu.
Líkt og undanfarið var þróunin afar ólík eftir því hvort litið er til neyslu innanlands eða erlendis. Kortavelta heimila erlendis jókst um 4,4% að raunvirði milli ára í júlí á meðan innanlandsvelta dróst saman um 0,9%.
Erlend neysla áfram drifkraftur kortaveltunnar
Í fyrsta sinn á árinu fjölgaði utanlandsferðum Íslendinga í júlí á milli ára, sem rímar vel við kortaveltutölurnar. Samkvæmt Ferðamálastofu fóru tæplega 68 þúsund Íslendingar um Keflavíkurflugvöll í mánuðinum, um 2% fleiri en á sama tíma í fyrra. Þótt brottförum hafi fækkað fyrri hluta ársins hefur kortavelta heimila erlendis aukist að raunvirði í hverjum einasta mánuði. Vöxturinn hefur þó farið minnkandi undanfarna mánuði og er nú töluvert hóflegri en þegar mest lét.
Kortaveltujöfnuður jákvæður yfir háönn ferðaþjónustunnar
Kortaveltujöfnuðurinn snerist í plús í júní eftir samfelldan halla frá síðasta hausti og var áfram jákvæður í júlí. Jöfnuðurinn mældist jákvæður um 2,6 ma.kr. í júní og jókst afgangurinn í 13,6 ma.kr. í júlí. Líkt og jafnan á sumrin vó aukin kortavelta erlendra ferðamanna hér á landi þá þyngra en kortavelta Íslendinga erlendis.
Hægari vöxtur einkaneyslu í vændum?
Einkaneysla jókst um 2,2% að raunvirði á fyrsta ársfjórðungi samkvæmt bráðabirgðatölum Hagstofunnar og tölur fyrir annan fjórðung birtast í lok mánaðarins. Þróun kortaveltu bendir til þess að vöxtur einkaneyslu hafi verið lítill sem enginn á öðrum fjórðungi og að sama þróun haldi áfram inn á þann þriðja. Það væri talsverð breyting frá fyrra ári þegar einkaneyslan var einn helsti drifkraftur hagvaxtar. Flestir hagvísar gefa nú til kynna að hægt hafi á umsvifum í hagkerfinu. Staða heimila er þó áfram sterk, kaupmáttur hefur haldið velli og sparnaður er enn tiltölulega mikill. Það styður þá skoðun okkar að einkaneyslan muni halda áfram að vaxa á árinu, þótt vöxturinn verði að öllum líkindum hægari en í fyrra þegar einkaneysla jókst um 4,3% milli ára.
Peningastefnunefnd Seðlabankans fundar í dag og hefur að öllum líkindum þessar tölur til hliðsjónar við vaxtaákvörðun sem birt verður í fyrramálið. Bankinn spáði í maí 2% einkaneysluvexti á árinu og trúlega mun þróun kortaveltunnar síðan frekar vega á lóðaskál minna aðhalds en hitt. Hún er hins vegar ólíkleg til að ríða baggamuninn við ákvörðunina nú. Líkt og fram kemur í vaxtaspá okkar teljum við að þrátt fyrir skýr merki um vaxandi slaka í hagkerfinu vegi þrálát verðbólga og of háar verðbólguvæntingar líklega þyngra. Við spáum því að nefndin hækki vexti um 0,25 prósentustig.
