UFS einkunn Íslandsbanka lækkar í B1

Í uppfærðu UFS mati Reitunar fær Íslandsbanki 84 stig og einkunnina B1.


Reitun hefur uppfært UFS mat Íslandsbanka þar sem mældur er árangur á sviði sjálfbærni. Íslandsbanki leggur ríka áherslu á góða frammistöðu á sviði sjálfbærni og hefur verið í hópi þeirra fyrirtækja sem fremst hafa staðið í þeim efnum. Í UFS mati Reitunar er horft til þriggja meginþátta, sem eru umhverfis - og félagsþættir, auk stjórnarhátta.

Fyrra mat sem kynnt var í júní var gefið út með fyrirvara um niðurstöðu í skoðun Fjármálaeftirlits Seðlabanka Íslands á sölunni á eignarhluta ríkisins í bankanum í mars í fyrra.

„UFS einkunn bankans lækkar um 1 þrep og fer úr flokki A3 í flokk B1, þar sem stigafjöldi lækkar úr 90 stigum í 84 stig. Það er niðurstaða Reitunar að viðbrögð bankans við málinu hafi verið góð og jákvætt er að unnið sé að viðeigandi úrbótum sem mun geta leitt bankann til hækkunar á næstu árum,“ segir í uppfærðu mati.

Í ljósi niðurstöðu Fjármálaeftirlitsins og allra eftirmála höfum við fyllsta skilning á lækkun UFS matsins. Umbætur hafa þegar átt sér stað og að þeim er áfram unnið hjá bankanum. Hvergi hefur dregið úr metnaði Íslandsbanka til að gera vel á sviði sjálfbærni og við ætlum að ná hæstu einkunn í mati Reitunar sem fyrst aftur.

Jón Guðni Ómarsson
Bankastjóri Íslandsbanka