Í nýrri þjóðhagsspá Íslandsbanka er búist við svipuðum hagvexti á þessu ári og í fyrra, en samsetning vaxtarins verður með öðrum hætti. Í ár skýra utanríkisviðskipti verulegan hluta vaxtarins þar sem útflutningur eykst lítillega á sama tíma og innflutningur skreppur saman. Þá vex einkaneysla hóflega í ár. Samkvæmt spánni mun svo hagvöxtur taka við sér á ný á næstu tveimur árum, drifinn áfram af kraftmeiri einkaneyslu, viðsnúningi í fjárfestingu og hraðari útflutningsvexti.
Þjóðhagsspá Íslandsbanka: Krappur sjór en kjölfestan traust
Greining Íslandsbanka spáir fyrir um þróun efnahagsmála árin 2026-2028
Verðbólguhorfur hafa breyst eftir að til átaka kom við Persaflóa. Innflutt verðbólga er líkleg til að aukast á næstunni og verðbólga reynist þrálátari en áður var spáð. Samkvæmt spánni mun forsenduákvæði kjarasamninga bresta í haust, en gert er ráð fyrir að samið verði um lítillega meiri launahækkanir á næsta ári og að samningar haldi að öðru leyti.
Vegna þrálátrar verðbólgu og hárra verðbólguvæntinga mun vaxtalækkunarferli Seðlabankans tefjast. Vextir hafa verið hækkaðir um 0,5 prósentustig á árinu og spáin gerir ráð fyrir frekari hækkun á þriðja ársfjórðungi. Í kjölfarið verða stýrivextir óbreyttir fram á fyrsta fjórðung næsta árs, en þá hefst hægfara vaxtalækkunarferli sem mun standa fram á árið 2028.
Stiklað á stóru
Hagvöxtur – Tímabundnar áskoranir í útflutningi og háir raunvextir halda aftur af hagvexti á næstunni. Spáð er 1,3% hagvexti í ár, 2,1% árið 2027 og 2,5% árið 2028
Utanríkisviðskipti – Minni viðskiptahalli í kortunum en verið hefur. Viðskiptahalli í ár verður 1,9% og í kringum 1,5% árin 2027-2028
Vinnumarkaður – Slaki á vinnumarkaði og hægur kaupmáttarvöxtur. Laun hækka um 6,2% í ár, 5,7% árið 2027 og 4,9% árið 2028
Verðbólga – Innflutt verðbólga líkleg til að láta á sér kræla sem tefur fyrir hjöðnun hennar á næstunni. Verðbólga mun þó þokast niður með tímanum. Spáð er 5,1% verðbólgu að meðaltali í ár, 4,3% árið 2027 og 3,8% árið 2028
Vextir – Seðlabankinn er í snúinni stöðu. Líkur á hækkun vaxta á þriðja ársfjórðungi og að hægfara vaxtalækkunarferli hefjist á fyrsta fjórðungi næsta árs
Krónan – Líkur á veikingu krónu aukast jafnt og þétt á spátímanum. Búist er við um það vil 5% veikari krónu í lok spátímans
