Greining Íslandsbanka gefur út skýrslu um þróun orkumála á Íslandi. Í skýrslunni er farið yfir upphaf rafvæðingar til dagsins í dag og horft er til framtíðar með hliðsjón af þeim áskorunum og tækifærum sem blasa við. Sérstök áhersla er lögð á efnahagslega þýðingu orkuskipta, áhrif þeirra á útflutning, fjárfestingar og samkeppnishæfni íslensks atvinnulífs.

Á síðustu áratugum hefur Ísland gengið í gegnum róttækar og djúpstæðar breytingar í orkumálum, sem hafa haft víðtæk áhrif á samfélagið, atvinnulífið og efnahagslega stöðu þjóðarinnar. Frá því að vera samfélag þar sem kol og mór voru helstu orkugjafarnir hefur Ísland þróast yfir í að vera eitt fremsta land heims í nýtingu endurnýjanlegrar orku.