Athugið

Þessi frétt er meira en sex mánaða gömul og tölfræði gæti hafa breyst

19. mars 2020

Niðurstöður aðalfundar Íslandsbanka 2020

Aðalfundur Íslandsbanka var haldinn í dag, fimmtudaginn 19. mars kl 15:00 í höfuðstöðvum bankans að Hagasmára 3, 201 Kópavogi. Friðrik Sophusson, fráfarandi formaður stjórnar, flutti skýrslu stjórnar og Birna Einarsdóttir, bankastjóri, gerði grein fyrir reikningum félagsins fyrir árið 2019 og helst þætti í starfsemi hans á árinu. Birna fór einnig yfir sterka stöðu bankans í ljósi þeirrar stöðu sem upp væri komin með COVID-19 og helstu ráðstafanir bankans í því skyni.

Efnahagslægð framundan en staða bankans er traust

Í lokaávarpi sínu sem formaður stjórnar Íslandsbanka, vísaði Friðrik í trausta stöðu bankans sem væri sérstaklega mikilvæg nú þegar hagkerfinu hafi verið reitt þungt högg af COVID-19 faraldrinum. Góðu heilli væru opinberir aðilar, fjármálageirinn, fyrirtækin og heimilin í landinu almennt tiltölulega vel undir slíkt högg búin. Jafnframt nefndi hann að afnám á sveiflujöfnunaraukanum í tvö ár væri mikilvægt framlag til að styrkja stöðu viðskiptabankanna svo þeir geti brugðist við vanda fyrirtækja og almennings í yfirstandandi erfiðleikum. Stjórnvöld þyrftu að fylgja þessu eftir með frekari lækkun á bankaskatti því þrátt fyrir samþykkt Alþingis um lækkun á skattinum í 0,145% á nokkrum árum yrðu skattar á íslenska banka enn um fimm sinnum hærri en í nágrannalöndunum. Núverandi samþykkt lækkun ætti engu að síður að taka gildi strax í ljósi þeirra stöðu sem komin er upp í dag.

Friðrik bar upp tillögur til aðalfundar, sem m.a. fólu í sér að ekki verði greiddur arður til hluthafa vegna ársins 2019 í ljósi óvissu af völdum fordæmalausra aðstæðna á fjármálamörkuðum, breytingu á starfskjarastefnu og stjórn bankans. Að lokum þakkaði Friðrik fráfarandi stjórnarmönnum fyrir gott samstarf og óskaði þeim velfarnaðar.

Hallgrímur Snorrason, nýkjörinn formaður stjórnar, þakkaði kjörið og bauð nýja stjórnarmenn velkomna.

Persónuleg í stafrænum heimi

Birna Einarsdóttir, bankastjóri Íslandsbanka, fór einnig yfir sterka stöðu bankans í ljósi þeirrar stöðu sem upp væri komin vegna COVID-19. Eigin- og lausafjárhlutföll bankans eru sterk og gefa bankanum tækifæri til að vinna að lausnum með þeim einstaklingum og fyrirtækjum sem á þurfa að halda. Birna fór yfir árangur síðasta árs og framtíðarsýn bankans að vera númer eitt í þjónustu þar sem ein helsta áskorunin sé að vera persónuleg í stafrænum heimi.

Snertingar við viðskiptavini bankans á síðasta ári voru 47 milljónir talsins og voru 99% þeirra stafrænar. Í máli Birnu kom einnig fram að á árinu 2019 hafi verið farið í stefnumótunarvinnu með Boston Consulting Group og eru lykilverkefni þeirrar vinnu langt komin eða lokið. Þar á meðal var innleiðing á nýrri sjálfbærnistefnu sem starfsfólk tók þátt í að móta en nú er unnið að innleiðingu hennar í alla þætti starfseminnar.