Ólíkt því sem verið hefur undanfarin misseri dróst velta saman bæði innanlands og erlendis í ágúst. Kortavelta heimila innanlands dróst saman um 2,6% að raunvirði milli ára og hefur nú minnkað í sex af fyrstu átta mánuðum ársins. Velta þeirra erlendis dróst lítillega saman eða um 0,1%, sem er í fyrsta sinn frá því í apríl 2024 sem hún gefur eftir milli ára.

Kortaveltujöfnuður í hæstu hæðum

Kortaveltujöfnuðurinn, þ.e. velta erlendra korta hér á landi að frádreginni veltu innlendra korta erlendis, var jákvæður um rúmlega 22 ma.kr. í ágúst og hefur ekki mælst hærri í krónum talið í einum mánuði. Líkt og jafnan yfir háönn ferðaþjónustunnar vó kortavelta erlendra ferðamanna hér á landi umtalsvert þyngra en kortavelta Íslendinga erlendis, en munurinn er nú meiri en áður hefur sést. Ágúst er jafnan stærsti afgangsmánuður ársins og nam afgangur á kortaveltujöfnuðinum 18,4 ma.kr. í ágúst í fyrra.

Velta erlendra greiðslukorta hér á landi jókst um 10,3% milli ára í ágúst og hefur vöxtur hennar aukist jafnt og þétt eftir því sem liðið hefur á árið. Þegar litið er á brottfarir erlendra farþega um Keflavíkurflugvöll voru þær 314 þúsund í ágúst og hafa raunar aldrei verið fleiri. Fjölgunin milli ára nam þó aðeins 0,4% þrátt fyrir það aðdráttarafl sem við áttum von á að sólmyrkvinn myndi hafa. Nokkur munur hefur því verið á milli vaxtar í brottförum annars vegar og kortaveltu hins vegar, sem endurspeglar að hver ferðamaður skilur nú eftir fleiri krónur hér á landi en áður. Hafa ber þó í huga að hluti þess skýrist af verðlagshækkunum hér á landi fremur en aukinni neyslu í magni mælt.

Hægari vöxtur einkaneyslu

Einkaneysla jókst um 0,8% að raunvirði á öðrum ársfjórðungi samkvæmt bráðabirgðatölum Hagstofunnar eftir 1,7% vöxt á þeim fyrsta. Á fyrri helmingi ársins nemur vöxturinn því 1,3% samanborið við 3% á sama tímabili í fyrra.

Þróun kortaveltunnar bendir til þess að enn hafi hægt á vextinum það sem af er þriðja ársfjórðungi. Kortaveltan hefur dregist saman um 0,8% að jafnaði í júlí og ágúst og gæti einkaneysla því staðið í stað eða dregist lítillega saman á fjórðungnum.

Athygli vekur að samdrátturinn mælist í sama mánuði og væntingar heimila tóku stökk upp á við eftir mjög útbreidda svartsýni mánuðina á undan. Væntingavísitala Gallup hækkaði um 18,7 stig í ágúst og mældist 75,7 stig, sem er hæsta gildi hennar síðan í september í fyrra. Svo kallaði „Stemningarsamdrátturinn“, sem lengst af þessu ári hefur falist í því að heimilin mátu horfur verri en hegðun þeirra gaf tilefni til er því að minnka á sama tíma og heimilin draga saman seglin í útgjöldum.

Ágústtölurnar eru líka fyrsti mælikvarðinn á neyslu heimilanna eftir að Peningastefnunefnd Seðlabankans hækkaði vexti um 0,25 prósentustig um miðjan síðasta mánuð, en það var þriðja vaxtahækkun ársins. Bendir þróun kortaveltunnar til þess að aðhaldið bíti á vaxandi mæli á eftirspurn heimilanna. Á móti vegur að verðbólga mældist 5,6% í ágúst, eða 5,2% án húsnæðis. Endurskoðun kjarasamninga, sem ljúka á fyrir 8. október, er því næsti stóri óvissuþátturinn fyrir bæði verðbólguhorfur og þróun einkaneyslu.