Eftir átta ánægjuleg og lærdómsrík ár hefur nú verið ákveðið að loka Kass. Appið var fyrst tekið í notkun í byrjun árs 2016, en það er í eigu Íslandsbanka og þróað í samstarfi við Memento.
Kass fékk íslensku vefverðlaunin, sem Samtök vefiðnaðarins standa fyrir, sem besta appið 2016 og hefur haft mikil áhrif á notkun greiðslutækja á Íslandi. Umhverfi fjártækni og greiðslulausna er hins vegar síkvikt og breytingar örar. Mikil þróun hefur átt sér stað í appi Íslandsbanka og mun sú þróun halda áfram og taka mið af þörfum viðskiptavina.
Íslandsbanki fylgist jafnframt náið með þeirri miklu og hröðu þróun sem á sér stað á sviði tæknilausna í fjármálaþjónustu og leggur ríka áherslu á samstarf og stuðning við verkefni sem koma muni viðskiptavinum bankans til góða.