Eignastýring Storebrand hefur frá árinu 2018 átt í samstarfi við Íslandssjóði, dótturfélag Íslandsbanka. Þar hefur fagfjárfestum gefist kostur að fjárfesta í sjóðum Storebrand, þar á meðal grænum sjóðum. Markmið Storeband nú, í samstarfi við Íslandsbanka, er að vekja athygli og áhuga almennings á sjálfbærum fjárfestingum.
Storebrand Asset Management er stærsta einkarekna eignastýringarfyrirtæki í Noregi með rúmlega 84 milljarða evra í stýringu. Þá er Storebrand í fararbroddi á Norðurlöndum í lífeyrissparnaði og almennum sparnaði sem byggir á sjálfbærum fjárfestingum. Storebrand hefur í rúman aldarfjórðung fjárfest í samfélagslegum verkefnum fyrir hönd viðskiptavina sinna, bæði innan og utan Norðurlandanna.
Þeir sjóðir sem nú standa íslenskum viðskiptavinum til boða í gegnum Íslandsbanka eru:
- Storebrand Global ESG Plus, kolefnislaus hlutabréfasjóður sem sérhæfir sig í fjárfestingum utan atvinnugreina sem nýta jarðefnaeldsneyti og uppfylla kröfur um umhverfislega og félagslega þætti, sem og kröfur um vandaða stjórnarhætti (UFS).
- Storebrand Global Solutions, alþjóðlegur hlutabréfasjóður sem fjárfestir í fyrirtækjum sem hafa sjálfbærni að markmiði og eru að mati bankans vel í stakk búin til að mæta áskorunum tengdum sjálfbærnimarkmiðum Sameinuðu þjóðanna.
- Storebrand Global Indeks, vísitölutengdur hlutabréfasjóður sem miðar að því að ná sambærilegri ávöxtun og alþjóðlegur hlutabréfamarkaður, sem mæld er í viðmiðunarvísitölu sjóðsins.