Íslandsbanki hefur gerst aðili að alþjóðlegu samstarfsverkefni fjármálafyrirtækja um þróun og notkun á loftslagsmæli fyrir lána- og eignasafn bankans. Þátttaka í verkefninu er liður í sjálfbærnistefnu Íslandsbanka og frumkvæði bankans að víðtæku samstarfi um ábyrga viðskiptahætti sem stuðla að sjálfbærri þróun íslensks efnahagslífs ásamt því að styðja við heimsmarkmið Sameinuðu þjóðanna.
PCAF (e. Partnership for Carbon Accounting Financials) snýr að þróun og notkun á loftslagsmæli sem fjármálafyrirtæki geta nýtt til að greina kolefnislosun í lána- og eignasafni sínu. PCAF á uppruna sinn í Hollandi en frá því að það var sett á fót árið 2015 hafa yfir 80 bankar og fjármálafyrirtæki í öllum heimsálfum gerst aðilar að samstarfsverkefninu. Með þátttöku skuldbindur bankinn sig til að mæla og birta opinberlega innan þriggja ára upplýsingar um útblástur gróðurhúsalofttegunda sem rekja má til starfsemi lántaka bankans.
PCAF byggir á vísindalegum mælingum og setur upp mælikvarða sem eru sambærilegir á alþjóðavettvangi. Þannig gefst fjármálafyrirtækjum færi á að greina kolefnislosun í útlánasafni, setja sér markmið er varða lánveitingar og fjárfestingar, og mæla þann árangur sem náðst hefur.
Íslandsbanki hefur nú þegar, fyrstur íslenskra banka, sett sér heildstæðan sjálfbæran fjármálaramma og er þátttaka í PCAF liður í því að mæla kolefnissporið í allri virðiskeðjunni, þar með talið óbein áhrif.