Hálfur lífeyrir

Getur hentað þér að sækja um hálfan lífeyri hjá TR og lífeyrissjóðum áður en sótt er um fullar greiðslur?


Skerðingar á greiðslum Tryggingastofnunar (TR) eru með eldfimari umræðuefnum. Sitt sýnist hverjum um hlutverk stofnunarinnar og hvað teljist sanngjarnt þegar kemur að samspili tekna og greiðslna en lítið er þó rætt um hálfan lífeyri, nýjung frá því um áramótin 2017-2018.

Greiðslur lífeyris TR skerðast almennt vegna tekna. Hlutfallið er 45% hjá sambúðarfólki og skerðast þeir sem búa einir aukalega um 11,9% vegna heimilisuppbótar. Á þessu eru þó undantekningar. Almennt frítekjumark er 25.000 kr. á mánuði og að auki er sérstakt 100.000 kr. frítekjumark vegna launatekna. Þá hefur séreignarsparnaður engin áhrif á greiðslur ellilífeyris. Þetta á við um hefðbundna töku greiðslna frá stofnuninni en sé sótt um töku hálfs lífeyris skerðist sá helmingur ekki um krónu vegna tekna.

Með hálfum lífeyri er átt við að sótt sé um töku hálfra réttinda hjá lífeyrissjóðum (hinn helmingurinn bíður þá fullrar töku) og sömuleiðis töku hálfra réttinda hjá TR. Eins og áður segir er hálf taka lífeyris hjá TR frábrugðin hefðbundinni fullri töku að því leiti að engar tekjutengingar og skerðingar eru á greiðslum.

Ekki geta allir sótt um

Nokkur skilyrði eru fyrir töku hálfs lífeyris:

  • Umsækjandi þarf að vera orðinn 65 ára
  • Kanna þarf hvort lífeyrissjóður geri kröfu um lækkað starfshlutfall
  • Sækja þarf um hjá Tryggingastofnun og öllum lífeyrissjóðum sem greitt hefur verið í
  • Allir lífeyrissjóðir viðkomandi þurfa að samþykkja umsóknina. Ekki er víst að allir lífeyrissjóðir séu tilbúnir til þess strax.
  • Hálf réttindi hjá lífeyrissjóðum að viðbættum hálfum lífeyri Tryggingastofnunar þurfa í það minnsta að vera jöfn fullum ellilífeyri hjá stofnuninni

Taka hálfs lífeyris getur hentað ýmsum, t.d. þeim sem hyggjast vinna fram yfir 65 ára aldur. Áður en haldið er af stað er þó mikilvægt að kanna hvort lífeyrissjóðirnir séu tilbúnir til þess að greiða hálfan lífeyri og hvort samanlagðar greiðslur verði nógu háar til að ráðstöfunin sé leyfileg.

Íslandsbanki veitir ráð og leiðbeiningar varðandi starfslok og sparnað á lífeyrisaldri. Þú getur pantað ráðgjöf eða spjallað við okkur í síma 440-4900.

Fyrirlestur um fjármál við starfslok


Björn Berg, fræðslustjóri Íslandsbanka, ræðir um það sem mikilvægast er að hafa í huga í aðdraganda starfsloka.

Höfundur


Björn Berg Gunnarsson


Fræðslustjóri

Senda tölvupóst