Hressilegur meðvindur með ferðaþjónustu á komandi misserum

Erlendir ferðamenn hingað til lands með flugi voru tæplega 1,7 milljónir á árinu 2022 ef miðað er við brottfarartölur um Keflavíkurflugvöll. Við það bætist nokkur fjöldi farþega um Akureyrarflugvöll að ógleymdum erlendum ferðamönnum sem sóttu landið heim með ferjunni Norrænu sem og með skemmtiferðaskipum. Hefur ferðafólk hér á landi ekki verið fleira frá árinu 2019.

Það sem af er ári hefur fjöldi ferðamanna hér á landi verið í samræmi við spá okkar frá febrúarbyrjun. Efnahagsmótbyr í Bretlandi og víðar, sem við töldum áhættuþátt fyrir eftirspurn eftir Íslandsferðum í upphafi síðasta vetrar, virðist engin teljandi áhrif hafa á ferðamannastraum hingað til lands. Alls komu 720 þúsund ferðamenn til landsins um Keflavíkurflugvöll á fyrstu fimm mánuðum ársins.

Flest bendir til þess að ferðasumarið verði myndarlegt, hvort sem horft er í bókunarstöðu hjá ferðaþjónustufyrirtækjum, áætlanir um fjölda flugferða til og frá landinu eða viðhorfskannanir.

Í nýlegri þjóðhagsspá okkar spáum við því að ríflega 2,1 milljón ferðamanna sæki landið heim um Keflavíkurflugvöll á þessu ári, álíka margir og sóttu landið heim árið 2017. Á næsta ári gerum við ráð fyrir rúmum 2,3 milljónum ferðafólks og tæplega 2,5 milljónum árið 2025. Næstu tvö ár verða því metár í ferðaþjónustu gangi spá okkar eftir. Hafa ber í huga að spá þessi miðast við brottfarir um Keflavíkurflugvöll en við þá tölu bætast m.a. farþegar með Norrænu og með skemmtiferðaskipum.

Hægari fjölgun ferðamanna þegar frá líður í spá okkar skýrist meðal annars af skorðum í framboði á gistingu og öðrum tilheyrandi innviðum. Til að mynda eru nýframkvæmdir í byggingu hótela nú með allra minnsta móti á höfuðborgarsvæðinu í samanburði við undanfarin ár. Jafnvel þótt slegið yrði í þann klár á komandi fjórðungum skilar það sér tæpast í auknu framboði hótelgistingar fyrir lok spátímans. auk þess sem gæti hækkandi raungengi með tímanum dregið úr ferðavilja sumra hingað til lands.