Íslenskur efnahagur hefur rétt myndarlega úr kútnum eftir skarpt samdráttarskeið í kjölfar faraldursins. Á síðasta ári var hagvöxtur 6,4% og hefur vöxturinn ekki verið hraðari frá árinu 2007. Greining Íslandsbanka spáir því að hagvöxtur mælist 3,1% á þessu ári, sem er svipaður vöxtur og í síðustu spá. Útflutningsvöxtur vegur þyngst í hagvextinum í ár en hlutur innlendrar eftirspurnar í vextinum minnkar verulega miðað við síðustu tvö ár. Von er á 2,4% hagvexti á næsta ári og 2,8% vexti árið 2025.
Útlit er fyrir bata í utanríkisviðskiptum þegar líða tekur á spátímann eftir umtalsverðan viðskiptahalla síðustu ár. Hagfelldari utanríkisviðskipti ásamt fleiri þáttum auka líkur á styrkingu krónunnar þegar frá líður. Í spánni er gert ráð fyrir að krónan verði um það bil 8% sterkari í lok spátímans en hún var í ársbyrjun 2023.
Verðbólga hefur reynst þrálát en lætur undan síga á spátímanum, sér í lagi vegna rólegri íbúðamarkaðar og stöðugra verðlags erlendis. Það dregur hægt og sígandi úr spennu á vinnumarkaði og horfur eru á að kaupmáttur launa taki að vaxa á ný á næsta ári. Þrálát verðbólga kallar á talsvert aðhald Seðlabankans og útlit er fyrir að stýrivextir muni ná hámarki í 9,5% síðar á þessu ári. Hægfara vaxtalækkunarferli gæti hafist snemma árs 2024.
