Question 1

Áhættumenning

Accepted Answer

Góð áhættumenning er grundvöllur að góðri og upplýstri ákvörðunartöku.  Við sækjum viðeigandi þjálfun og fræðslu til þess að geta sinnt störfum okkar sem best. Við hvetjum til opinna samskipta og veitum uppbyggilega gagnrýni. Við erum ábyrg í þeim störfum sem við tökum okkur fyrir hendur. Hvað þýðir þetta fyrir mig?  Ég tek ákvarðanir með áhættumenningu og áhættuvilja bankans að leiðarljósi.  Ég hugsa um orðspor bankans við ákvarðanatöku. Ég hvet til opinna samskipta og veiti uppbyggilega gagnrýni í störfum mínum.

Question 2

Brot

Accepted Answer

Um brot bankastjóra og alls starfsfólks gegn starfs- og siðareglum gilda reglur um háttsemisbrot en tilgangur þeirra er að skilgreina viðmið við beitingu viðurlaga og að málsmeðferð sé sanngjörn og gætt sé að jafnræði. Þær gilda hvort sem um er að ræða ytra eða innra regluverk sem gildir um starfsemi Íslandsbanka. Að hlíta ekki starfs- og siðareglunum getur haft í för með sér áhrif á framgang starfsfólks í starfi innan bankans eða brottvísun ásamt því að starfsfólk getur borið persónulega bóta- eða refsiábyrgð vegna brota sinna.  Mögulegum brotum stjórnarfólks gegn starfs- og siðareglum skal vísa til stjórnarformanns Íslandsbanka, en mögulegum brotum stjórnarformanns skal vísa til varaformanns.

Question 3

Einelti, kynferðisleg og kynbundin áreitni og ofbeldi

Accepted Answer

Við leggjum okkur fram við að skapa umhverfi sem tryggir og eflir velferð okkar. Starfsumhverfið á að vera uppbyggilegt og laust við einelti, kynferðislega og kynbundna áreitni og ofbeldi (EKKO). Við eigum öll rétt á því að komið sé fram við okkur af virðingu og að við sætum ekki einelti, kynbundinni áreitni, kynferðislegri áreitni né ofbeldi af nokkru tagi. Við líðum ekki slíka hegðun, hvorki af hálfu okkar né viðskiptavina, hvort sem hún er framin innan eða utan starfsstöðva bankans. Hvað þýðir þetta fyrir mig?  Ég kem fram við samstarfsfélaga og viðskiptavini af virðingu, háttvísi og heiðarleika.  Ég hafna áreiti, mismunun og ósæmilegri hegðun.  Ég beini tilkynningu í viðeigandi farveg telji ég mig hafa orðið fyrir einelti, kynferðislegri eða kynbundinni áreitni eða ofbeldi á vinnustaðnum. Ég beini tilkynningum í viðeigandi farveg ef ég hef orðið vitni að eða hef rökstuddan grun um að óviðeigandi atvik eða háttsemi hafi átt sér stað.

Question 4

Fylgni við lög, reglur og stefnur bankans

Accepted Answer

Við högum störfum okkar í samræmi við lög og reglur sem gilda um starfsemi bankans sem og það innra regluverk sem bankinn hefur sjálfur sett sér um starfsemi sína. Hvað þýðir þetta fyrir mig?  Ég þekki og fylgi lögum, reglum og innra regluverki bankans sem gilda um starfssvið mitt. Ég tilkynni til viðeigandi aðila innan bankans ef ég verð áskynja um brot eða hef grun um brot á lögum, reglum eða innra regluverki.  Ég leita til sérfræðinga ef ég er í vafa um túlkun á lögum, reglum eða innra regluverki í starfi mínu.

Question 5

Hagsmunaárekstrar

Accepted Answer

Bankinn leggur ríka áherslu á að við séum öll meðvituð um hættuna á hagsmunaárekstrum í starfsemi hans. Við skulum gera allar viðeigandi ráðstafanir til að greina, meta, takast á við, takmarka eða koma í veg fyrir raunverulega og mögulega hagsmunaárekstra í starfsemi bankans. Slíku er ætlað að tryggja vandaða ákvarðanatöku og hlutlægni okkar í starfi. Hvað þýðir þetta fyrir mig? Ég þekki og virði stefnu bankans um meðhöndlun hagsmunaárekstra og reglur um meðhöndlun hagsmunaárekstra. Ég greini hvaða aðstæður það eru sem valda eða geta valdið hagsmunaárekstrum í starfsemi bankans. Ég ber ábyrgð á að greina og koma í veg fyrir hagsmunaárekstra sem geta komið upp í störfum mínum og tengst mér persónulega þ.e. hvers konar tengsl mín, fyrrum eða yfirstandandi, persónuleg eða fagleg, sem eru til þess fallin að skapa hagsmunaárekstra í starfi. Ég er vakandi fyrir mögulegum hagsmunaárekstrum og fylgi því verklagi sem gildir um tilkynningar og meðhöndlun slíks.

Question 6

Hegðun

Accepted Answer

Við erum heiðarleg í framkomu og sinnum skyldum okkar af fagmennsku, varkárni og kostgæfni. Við sýnum ekki af okkur óviðeigandi háttsemi, þ.e. hegðun sem brýtur gegn innri reglum bankans, þ.m.t. reglum þessum. Við skulum ekki veita eða þiggja gjafir, boðsferðir, greiðslur eða annan ávinning sem gæti talist mútur eða eru til þess fallin að hafa óeðlileg áhrif á ákvarðanatöku eða starfsemi bankans.  Hvað þýðir þetta fyrir mig? Ég kem fram við allt starfsfólk og viðskiptavini af virðingu Ég sýni ekki af mér óviðeigandi háttsemi. Ég tilkynni um óviðeigandi háttsemi starfsfólks til næsta yfirmanns, mannauðsdeildar eða Regluvörslu.

Question 7

Í eftirliti

Accepted Answer

Bankastjóri skal tryggja að skilvirkt eftirlit sé með starfs- og siðareglunum og skal hafa eftirlit með hlítni framkvæmdastjóra og æðstu stjórnenda stoðeininga við reglum þessum sem og ber að fylgja reglum um háttsemisbrot ef upp kemur að viðkomandi hlíti þeim ekki Framkvæmdastjórar og æðstu stjórnendur stoð- og eftirlitseininga hafa eftirlit með háttsemi starfsfólks á sínu sviði og ber að fylgja reglum um háttsemisbrot ef upp kemur að starfsfólk hlíti þeim ekki. Framkvæmdastjóri Regluvörslu hefur eftirlit með fylgni við starfs- og siðareglurnar. Honum ber að upplýsa stjórn, að undangenginni umfjöllun í Áhættustefnunefnd þegar við á, um fylgni við þær og beitingu viðurlaga. Slíkt skal gert í reglulegri skýrslugjöf eða þegar hann telur tilefni til.

Question 8

Í skipulagi

Accepted Answer

Stefna þessi er samþykkt af stjórn bankans. Framkvæmdastjóri Regluvörslu er eigandi hennar og ber ábyrgð á að endurskoðun eigi sér stað a.m.k. árlega.

Question 9

Í starfsemi

Accepted Answer

Bankastjóri ber ábyrgð á innleiðingu stefnu þessarar. Framkvæmdastjórar og æðstu stjórnendur stoð- og eftirlitseininga skulu sjá um að innleiða stefnu þessa inn á starfssvið sín. Í því felst m.a. að tryggja að starfsfólk þeirra þekki reglur þessar, skyldur sínar samkvæmt þeim og starfi í samræmi við þær, viðeigandi ytri og innri reglur og verklag bankans. Stjórn, bankastjóri, allt starfsfólk og verktakar skulu staðfesta að þau hafi kynnt sér efni starfs- og siðareglnanna og skuldbinda sig til að fylgja þeim. Framkvæmdastjóri Regluvörslu skal leggja fram reglur um háttsemisbrot þar sem er að finna viðurlög við að hlíta ekki starfs- og siðareglum. Framkvæmdastjórn samþykkir reglurnar.

Question 10

Innherjaupplýsingar

Accepted Answer

Við kunnum eftir atvikum að búa yfir innherjaupplýsingum, þ.e. upplýsingum sem eru ekki aðgengilegar almenningi og geta haft marktæk áhrif á markaðsverð fjármálagerninga. Meðferð okkar á innherjaupplýsingum skal vera í samræmi við viðeigandi lög, reglur og innri reglur bankans. Þannig er stuðlað að jafnræði meðal fjárfesta.  Hvað þýðir þetta fyrir mig?  Ég þekki og fylgi viðeigandi lögum og reglum um meðferð innherjaupplýsinga.  Ég þekki ferla sem fylgja því að vera skráður á innherjalista einstakra útgefanda þegar svo ber undir. Ég misnota ekki innherjaupplýsingar og sýni varkárni í viðskiptum með fjármálagerninga.

Question 11

Meðferð eigna bankans, umboð og heimildir

Accepted Answer

Við förum vel með eignir bankans hvort sem um er að ræða tækjabúnað eða aðrar eignir bankans. Við virðum þau umboð og heimildir sem okkur hefur verið veitt og störfum innan þeirra. Hvað þýðir þetta fyrir mig?  Ég vinn innan umboðs míns og heimilda sem samþykktar eru af bankanum. Ég þarf að kunna skil á og virða viðeigandi reglur og vinnuleiðbeiningar sem varða eignir bankans, umboð og heimildir.  Ég nota ekki eignir bankans í öðrum tilgangi en þeim sem settur er fram í reglum og vinnuleiðbeiningum.

Question 12

Peningaþvætti og fjármögnun hryðjuverka

Accepted Answer

Íslandsbanki leitast við að koma í veg fyrir að starfsemi hans sé notuð til peningaþvættis, fjármögnunar hryðjuverka og fjármögnunar gereyðingarvopna. Bankinn grípur til þeirra ráðstafana sem mögulegar eru til að uppfylla þær kröfur sem gerðar eru í þeim efnum til fjármálafyrirtækja á innlendum og alþjóðlegum vettvangi. Hvað þýðir þetta fyrir mig?  Ég þekki reglur og innra verklag um aðgerðir gegn peningaþvætti, fjármögnun hryðjuverka og fjármögnun gereyðingarvopna og skyldur samkvæmt þeim. Ég kynni mér áreiðanleikakönnun viðskiptavinar og niðurstöður áhættumats til þess að öðlast skilning á viðskiptavini, viðskiptasambandinu og áhættuflokkun þess.  Ég þekki þær áhættur sem fylgja þeirri vöru og þjónustu sem ég veiti. Ég er ávallt vakandi fyrir grunsamlegri hegðun og óvenjulegum færslum og tilkynni minnsta grun, ef hann vaknar.

Question 13

Persónuvernd

Accepted Answer

Persónuvernd og öryggi persónuupplýsinga er mikilvægur þáttur í starfsemi Íslandsbanka. Við förum með persónuupplýsingar í samræmi við lög og reglur um persónuvernd og vinnslu persónuupplýsinga og einsetjum okkur að gæta öryggis þeirra. Hvað þýðir þetta fyrir mig?  Ég þekki viðeigandi reglur sem gilda um vinnslu persónuupplýsinga. Ég tilkynni strax ef upp kemur öryggisbrestur við vinnslu persónuupplýsinga.  Ég nýti mér ekki persónuupplýsingar í öðrum tilgangi en heimilt er.  Ég leita til persónuverndarfulltrúa bankans ef ég er í vafa um vinnslu persónuupplýsinga.

Question 14

Samfélagsleg áhrif – heimsmarkmið Sameinuðu þjóðanna

Accepted Answer

Það er markmið Íslandsbanka að vera hreyfiafl til góðra verka í íslensku samfélagi og skapa virði til framtíðar á sjálfbæran hátt fyrir okkur, viðskiptavini okkar, hluthafa og samfélagið allt. Samhliða fjárhagslegum markmiðum leggur bankinn áherslu á samþættingu sjálfbærnisjónarmiða við starfsemi sína til viðbótar við arðsemismarkmið sín. Íslandsbanki styður og virðir alþjóðleg mannréttindi og grundvallarréttindi launafólks, m.a. jafnrétti, félagafrelsi og bann við nauðungarvinnu og barnaþrælkun. Bankinn leggur jafnframt ríka áherslu á að skapa vinnuumhverfi þar sem virðing, jafnræði og fjölbreytileiki eru í fyrirrúmi og koma í veg fyrir hvers kyns mismunun. Við skulum öll njóta jafnræðis og jafnra tækifæra til að þróast í starfi. Bankinn hefur einsett sér að styðja sérstaklega við fjögur af heimsmarkmiðum Sameinuðu þjóðanna: Menntun fyrir alla, jafnrétti kynjanna, nýsköpun og uppbyggingu og aðgerðir í loftslagsmálum. Hvað þýðir þetta fyrir mig?  Ég þekki þau heimsmarkmið Sameinuðu þjóðanna sem bankinn hefur einsett sér að styðja og tek mið af þeim í störfum mínum. Ég þekki sjálfbærnistefnu og markmið Íslandsbanka og tek mið af þeim í störfum mínum.

Question 15

Tilkynningar er varða misferli

Accepted Answer

Íslandsbanki stuðlar að góðum viðskiptaháttum og trausti á fjármálastarfsemi með því að hvetja til opinna samskipta. Bankinn hvetur okkur og ytri aðila til að tilkynna ef við verðum vör við, höfum vitneskju eða grun um hugsanlegt misferli sem tengist starfsemi bankans. Við skulum vera upplýst um ferla og verklag við tilkynningu meintra brota. Bankinn verndar okkur sem í góðri trú tilkynnum um meint brot gegn því að verða fyrir misrétti sem rekja má til tilkynningarinnar. Hvað þýðir þetta fyrir mig?  Ég tilkynni grun um misferli til rétts aðila, t.d. frávik frá lögum og reglum, svik, fölsuð skjöl, misnotkun á upplýsingum, öryggi á vinnustað ekki uppfyllt eða ofbeldi. Ég veit að ég get tilkynnt grun um misferli nafnlaust í gegnum kerfi sem er sérstaklega aðgreint frá öðrum upplýsingakerfum bankans og vistað utan hans. Ég þekki ferla er varða tilkynningar á meintu misferli innan bankans.

Question 16

Trúnaðar- og þagnarskylda

Accepted Answer

Viðskiptavinir Íslandsbanka geta treyst bankanum fyrir meðferð trúnaðarupplýsinga. Við fylgjum viðeigandi lagaákvæðum um trúnaðarupplýsingar og þagnarskyldu og tryggjum með því öryggi upplýsinga viðskiptavina bankans, jafnt innan bankans sem utan. Hvað þýðir þetta fyrir mig?  Ég virði lög og reglur um þagnarskyldu og meðferð trúnaðarupplýsinga. Ég tilkynni brot gegn þeim eins fljótt og auðið er til næsta yfirmanns eða framkvæmdastjóra Regluvörslu. Ég nota aldrei trúnaðarupplýsingar í eigin þágu eða vandamanna.  Ég deili ekki trúnaðarupplýsingum um viðskiptavini með þriðja aðila án samþykkis viðskiptavinar nema lög mæli svo fyrir. Ég tryggi að trúnaðarupplýsingar séu ekki aðgengilegar óviðkomandi og skil ekki trúnaðargögn eftir í opnu rými þegar ég fer.

Question 17

Umgengni á vinnustað

Accepted Answer

Við göngum snyrtilega um vinnustaðinn og skiljum hvorki eftir trúnaðargögn né persónulega muni þegar við yfirgefum vinnustaðinn, hvort sem það er innan dags eða í dagslok. Bankinn er vímuefnalaus vinnustaður. Reykingar, þ.m.t. rafretta, í húsakynnum bankans eru óheimilar. Við skulum ávallt hafa almenna snyrtimennsku í fyrirrúmi. Hvað þýðir þetta fyrir mig? Ég geng snyrtilega um vinnustaðinn. Ég klæðist snyrtilegum og viðeigandi fatnaði við vinnu mína. Ég vinn ekki undir áhrifum áfengis eða ávana- og fíkniefna.

Question 18

Upplýsingaöryggi

Accepted Answer

Við tryggjum öryggi upplýsinga í okkar vörslu og leitumst við að tryggja að viðskiptavinir og hagsmunaaðilar bankans verði ekki fyrir óþægindum vegna upplýsingatæknimála. Hvað þýðir þetta fyrir mig?  Ég fylgi stefnu bankans um upplýsingaöryggi.  Ég tilkynni eins fljótt og auðið er um frávik frá upplýsingaöryggi eða öryggiskröfum.  Ég fylgi viðeigandi verklagi innan bankans er varðar upplýsingaöryggi og meðferð persónuupplýsinga.  Ég nota upplýsingakerfi bankans eingöngu að því marki sem er nauðsynlegt vegna starfa minna og í samræmi við lög og reglur þar að lútandi.

Question 19

Viðhald faglegrar færni

Accepted Answer

Við þjónum viðskiptavinum okkar best þegar við viðhöldum þeirri færni og þekkingu sem þarf til að sinna starfsskyldum okkar. Hvað þýðir þetta fyrir mig? Ég lýk nauðsynlegri þjálfun á réttum tíma, t.d. árlegri skyldufræðslu bankans. Ég viðheld þekkingu minni og sinni endurmenntun sem starf mitt gerir kröfur um. Ég uppfylli og viðheld öllum vottunum, leyfum eða skráningum sem bankinn, eftirlitsaðilar eða gildandi lög krefjast starfa minna vegna. Ég tilkynni tafarlaust um atvik sem geta haft áhrif á hæfi mitt til að gegna starfi mínu og ef þú missir tilskilin leyfi eða réttindi.

Question 20

Virk samkeppni

Accepted Answer

Íslandsbanki ástundar virka samkeppni á þeim mörkuðum sem hann starfar á og hefur sett sér samkeppnisréttaráætlun. Markmið samkeppnisréttaráætlunar bankans er að við þekkjum og fylgjum samkeppnislögum og að með viðeigandi þekkingu og markvissri fylgni við áætlunina sé komið í veg fyrir hugsanleg samkeppnislagabrot í starfseminni. Hvað þýðir þetta fyrir mig?  Ég þekki og fylgi samkeppnisréttaráætlun bankans og þeim reglum sem gilda um samkeppni fyrirtækja á markaði.  Ég tek ekki þátt í samræðum við keppinauta þar sem verð eða viðskiptalega viðkvæm atriði eru rædd. Verði ég vitni að slíku skal ég stöðva umræður, láta bóka mótmæli og víkja af fundi. Ég byggi ákvarðanir mínar um val á birgjum, vöru eða þjónustu út frá hagsmunum bankans.

Question 21

Ytri samskipti

Accepted Answer

Bankinn leggur áherslu á opin og gagnsæ samskipti við haghafa. Við fylgjum settu verklagi varðandi samskipti við fjölmiðla og aðra haghafa. Við höfum það hugfast að þátttaka okkar í opinberri umræðu getur haft áhrif á orðspor bankans. Hvað þýðir þetta fyrir mig? Ég tala ekki fyrir hönd bankans og/eða tjái mig um starfsemi hans í fjölmiðlum eða á samfélagsmiðlum án samþykkis forstöðumanns samskipta og fjárfestatengsla. Ég vísa á forstöðumann samskipta og fjárfestatengsla ef fjölmiðlar hafa samband við mig. Ég fylgi settu verklagi bankans vegna fyrirspurna frá eftirlitsaðilum. Ég sýni ábyrgð í almennri umfjöllun um bankann og tjái mig ekki um starfsemi eða stefnu bankans á samfélagsmiðlum. Ég gæti þess að háttsemi og orðræða mín á opinberum vettvangi sé ekki til þess fallin að hafa slæm áhrif á orðspor bankans.

Question 22

Þjónusta

Accepted Answer

Við vinnum með viðskiptavinum, byggjum upp traust og faglegt samband og horfum til framtíðar með þarfir þeirra að leiðarljósi. Hvað þýðir þetta fyrir mig?  Ég hef hagsmuni viðskiptavina að leiðarljósi við veitingu ráðgjafar og þjónustu.  Ég leysi fljótt og vel úr ábendingum viðskiptavina og fylgi innri reglum bankans um meðhöndlun kvartana.  Ég kem fram við viðskiptavini af virðingu og hlusta á þá.  Ég veiti aðeins þá þjónustu og hef milligöngu um þau viðskipti sem samræmast vöruframboði og þjónustustefnu bankans.

Starfs- og siðareglur

Tilgangur

Stefna Íslandsbanka

Vinnustaðurinn okkar

Viðskiptahættir

Persónuleg hegðun starfsfólks

Brot

Hlutverk og ábyrgð