Það helsta

Flutningar skýrðu að mestu hækkun vísitölunnar í apríl. Verð á eldsneyti (sem heitir nú orkugjafar og smurolíur til einkanota) hækkaði um 14% (0,37% áhrif á VNV) sem var í takti við okkar spá. Flugfargjöld hækkuðu um 6% (0,15% áhrif á VNV), en helsti munurinn á spám greiningaraðila lá í þessum lið. Alla jafna hækkar flugverð meira í apríl vegna páska, en vegna tímasetningar þeirra í ár var hækkunin minni en ella.

Reiknuð húsaleiga hækkaði nokkuð óvænt um 0,8% á milli mánaða (0,16% áhrif á VNV). Um er að ræða meiri hækkun en sést hefur síðustu mánuði, en þróunin er þó meira í takti við vísitölu leiguverðs húsnæðis- og mannvirkjastofnunar.

Aðrir helstu flokkar stóðu að mestu í stað á milli mánaða, þar á meðal matvörur, fatnaður, húsbúnaður og afþreying. Sú þróun er athyglisverð í ljósi hærra eldsneytisverðs og frétta af hækkandi flutningskostnaði vegna ástandsins úti í heimi.

Verðbólguhorfur næstu mánuði

Það jákvæða í tölum dagsins er að undirliggjandi verðbólguþrýstingur virðist ekki vera að aukast. Allar kjarnavísitölur lækkuðu á ársgrundvelli. Þrátt fyrir það gerum við ráð fyrir auknum innfluttum verðbólguþrýstingi á næstu mánuðum, miðað við aðstæður úti í heimi. Umfang hækkunarinnar og hversu lengi hún varir ræðst að verulegu leyti af framvindu átaka við Persaflóa.

Bráðabirgðaspá okkar fyrir næstu mánuði er eftirfarandi:

• maí: 0,1% hækkun VNV (5,1% ársverðbólga) – Lækkun virðisaukaskatts á eldsneyti úr 24% í 11% vegur á móti hækkunarþrýstingi.
• júní:  0,6 hækkun VNV (4,9% ársverðbólga) – Eldsneytisverð hækkar áfram en með minna móti. Jafnframt hækka flugfargjöld, veitingahús og gistiþjónusta vegna árstíðarsveiflu.
• júlí: 0,3% hækkun VNV (4,9% ársverðbólga) – Flugverð hækkar v. árstíðarsveiflu en útsölur draga úr verðhækkunum á öðrum liðum.

Ef bráðabirgðaspáin okkar gengur eftir mun ársverðbólga mælast 4,9% í júlí. Samkvæmt spánni mun verðbólga svo aukast lítillega í ágúst og enn frekar í september þegar aðgerðir stjórnvalda renna sitt skeið. Miðað við þá þróun mun verðbólga miðað við grunnspána verða yfir 4,7% forsenduákvæði kjarasamninga. Við teljum því líklegt að Peningastefnunefnd Seðlabankans, sem hefur þessa mælingu til hliðsjónar við næstu ákvörðun 20. maí, muni hækka stýrivexti.