Þrátt fyrir að langhæst laun séu greidd í ensku úrvalsdeildinni í knattspyrnu er launajöfnuður óvíða jafn mikill.
Pistillinn birtist fyrst sem innslag í Vellinum á Símanum sporti.
Meðal leikmaðurinn í ensku úrvalsdeildinni fær umtalsvert hærri laun en launahæsti forstjórinn í íslensku viðskiptalífi, eða um 36 milljónir króna á mánuði.
Launin eru langhæst á Englandi og þriðjungi hærri en á Spáni, þar sem meðallaun eru næst hæst, en þar með er auðvitað ekki öll sagan sögð.
Launajöfnuður er nefnilega langmestur á milli liða í ensku úrvalsdeildinni, einkum ef litið er til forskots þeirra sem greiða mest.
Á síðasta tímabili var það Manchester United. En þó meðallaun leikmanna United hafi verið svipuð samanlögðum meðallaunum leikmanna Cardiff, Hudderfield, Burnley, Newcastle og Brighton, er það þó umtalsvert jafnara en á Spáni. Þar eru Lionel Messi og félagar í Barcelona á álíka háum launum og leikmenn 12 launalægstu liðanna þénuðu til samans.
Forskot stóru liðanna á Spáni; Barcelona, Real og Atletico, ætti því samkvæmt þessum mælikvarða að vera nokkuð meira en toppliðanna á Englandi. Atletico, sem er í þriðja sæti á lista þeirra sem hæst launin bjóða, greiðir ríflega tvöfalt hærri laun en það fjórða, Valencia.
Að stóru leyti má rekja þetta til þess að tekjur liða eru mun jafnari á Englandi, einkum þar sem tekjum af sölu sjónvarpsréttar er að mestu dreift jafnt á milli félaganna þar í landi.
En hvaða lið ætli hafi nú hækkað laun leikmanna mest að undanförnu?
Ef við skoðum þau lið sem haldið hafa sæti sínu í úrvalsdeildinni undanfarin þrjú tímabili skera nágrannarnir sitt hvoru megin við Stanley Park sig úr en Everton og Liverpool hafa hækkð launin mest á meðal stóru liðanna á meðan Bournemouth og Burnley hafa gengið harðast fram meðal hinna smærri. Manchester City, Chelsea og Manchester Utd reka lestina í launahækkunum undanfarinna þriggja tímabila, en hafa svo sem borgað feykinóg fram að þessu og greiða þrátt fyrir allt hæst laun allra.
