Íslandsbanki fjármagnar nýtt hótel við Skógarböðin

Íslandsbanki hefur veitt Skógarböðunum framkvæmdalán til fjármögnunar á 120 herbergja hóteli með heilsulind, veitingaaðstöðu og ráðstefnusal. Gert er ráð fyrir að verklok verði á árinu 2027 og mun þá fjöldi ársstarfa við Skógarböðin vera orðin um 120 talsins. 

Jafnframt fjármagnaði Íslandsbanki framkvæmdir við stækkun á laugum Skógarbaðanna sem áætlað er að opni í haust. 

Rekstur Skógarbaðanna hefur gengið vel frá opnun og er tilkoma þeirra mikið framfaraskref fyrir ferðaþjónustuna á svæðinu. Margt heimafólk hefur keypt vetrarkort í böðin og hefur aðsókn heimafólks verið ein helsta forsenda velgengni baðanna. Nú er í fyrsta skiptið boðið upp á árskort í böðin en talsvert hefur verið óskað eftir slíku af heimafólki.  Allir hluthafar koma frá svæðinu hér á Akureyri og hafa sterka tengingu við það og vilja stuðla að frekari uppbyggingu þess. Ekki er áætlað að greiða út arð úr rekstri Skógarbaða næstu árin heldur á arðsemi rekstursins að renna inn í nýtt hótelverkefni.

Það hefur verið einstaklega skemmtilegt að fylgjast með uppbyggingu Skógarbaðanna sem hafa stutt við kröftuga ferðaþjónustu á Norðurlandi. Með byggingu á glæsilegu hóteli við Skógarböðin eru enn frekari skref stigin í því að gera Norðurlandið að spennandi áfangastað. Íslandsbanki vill vera hreyfiafl til góðra verka og er þetta verkefni gott dæmi um það en bankinn hefur verið þátttakandi í vegferð Skógarbaðanna frá upphafi. Samstarfið hefur verið mjög gott og eigendur og stjórnendur eiga mikið hrós skilið fyrir framkvæmd verkefnisins. Við hlökkum til áframhaldandi samstarfs.

Jón Birgir Guðmundsson
Forstöðumaður fyrirtækjamiðstöðvar Norðausturlands

Við höfum átt mjög gott samstarf við bankann og erum ánægð og ekki síst þakklát fyrir það traust sem okkur hefur verið sýnt frá fyrsta degi. Það er mikið verkefni fram undan og við ætlum að leggja okkur fram um að geta árið 2027 boðið upp á einkar áhugaverðan kost tengdan viðburðaferðamennsku.

Sigríður Hammer
Stjórnarformaður Hótel Gjár og Skógarbaða