Seðlabankinn, hagkerfið og verðbólga
Seðlabanki Íslands hélt stýrivöxtum óbreyttum í 7,5% á síðasta fundi og hafa líkurnar á frekari vaxtalækkunum á þessu ári minnkað verulega. Verðbólgan í september hækkaði um 0,11% sem þýðir að ársverðbólgan hækkaði úr 3,8% í 4,1% sem er yfir efra verðbólgumarkmiði Seðlabankans sem er 4,0%. Spár gera ráð fyrir að hún haldist i kringum 4,0% næstu mánuði.
Þrátt fyrir að innlend eftirspurn hafi hægt á sér er ljóst að þrótturinn í hagkerfinu er meiri en áður var talið. Seðlabankinn gerir ráð fyrir að hagvöxtur verði 2,3% í ár en hafði áður spáð 1,0%. Hægst hefur á fjölgun starfa en atvinnuleysi mælist lágt. Launahækkanir hafa verið meiri en búist var við sem gerir Seðlabankanum erfitt fyrir að ná verðbólgu að markmiði og líklegt að raunvextir haldist háir á næstu misserum sökum þess.
Innlend skuldabréf
Skuldabréfamarkaðurinn hefur einkennst af miklu framboði ríkisskuldabréfa og áframhaldandi háum raunvöxtum. Útgáfuáætlun ríkisins hefur verið framþung en nú þegar hefur verið gefið út 140 ma. af 180 ma. áætlaðri útgáfu á árinu.
Fyrir fjárfesta þá eru skuldabréfin áhugaverður kostur ef fram fer sem horfir í ljósi þess að vaxtastigið er enn nokkuð hátt og víða hægt að fá betri kjör en á innlánum. Skuldabréf með stuttum og meðallöngum líftíma virðast hagkvæmust, þar sem vaxtarófið er niðurhallandi og fáar vaxtalækkanir verðlagðar í verð þeirra. Verðbólguálag er tiltölulega hátt á lengri enda vaxtarófsins og óvissa um framhald vaxtalækkana.
Innlend hlutabréf
Hlutabréfamarkaðurinn hefur haldist stöðugur þrátt fyrir hátt vaxtastig. Verðlagning er sögulega lág og rekstur félaga almennt traustur. Fjárfestar horfa í auknum mæli til sjóðstreymis og arðgreiðslna, en minna til vaxtar.
Ferðaþjónustan hefur komið vel út eftir rólega byrjun sumars og aflaverðmæti í sjávarútvegi er hátt. Arðgreiðslur hafa numið yfir 80 ma. og flæðismyndin styður markaðinn, þó óvissa sé um flugfélög og veiðigjöld.
Veiking USD hefur haft neikvæð áhrif á tvískráð félög en gæti orðið jákvæð ef krónan veikist. Áhugi erlendra fjárfesta heldur áfram og einstaklingar sýna einnig aukinn áhuga, þó lífeyrissjóðir og einkafjárfestar séu rólegir.
Töluvert framboð af öðrum fjárfestingakostum hér heima hefur áhrif á innlenda markaðinn. Vel heppnað útboð Íslandsbanka ýtti tímabundið undir aukinn áhuga á markaðnum hér heima. Flæðismyndin ætti að líta vel út en það er ákveðin bið eftir meira flæði inn á markaðinn.
Erlendir markaðir
Flestir hlutabréfamarkaðir hafa verið nokkuð sterkir á árinu en verðþrýstingur gæti aukist með hærri verðkennitölum. Fram til þessa hafa erlendir markaðir horft að mestu framhjá þeirri umræðu sem hefur verið í kringum tollamál og aðra óvissu. Seðlabankar horfa nú fremur til vaxtalækkana og pólitískrar óvissu en tollamála. Seðlabanki Bandaríkjanna virðist ætla að horfa í gegnum fingur sér með verðbólgu í ljósi verri atvinnutalna og ýjar nú að lækkun vaxta í september.
Í Evrópu styðja aukin útgjöld til innviða og varnarmála hagvöxt en ýta undir verðbólgu. Stýrivextir hafa lækkað í álfunni en langtímavextir haldast háir. Í Bandaríkjunum hefur verðbólga komið á óvart en óvíst er hvernig tollar munu skila sér inn í verðlag næstu mánuði.
Lengri skuldabréfakröfur hækka og þrengja að áhættumeiri eignum. USD hefur veikst á móti flestum gjaldmiðlum og óvissa er um áframhaldandi þróun. Tækifæri liggja þó áfram í völdum geirum, sérstaklega á nýmarkaðssvæðum og í hærri ávöxtun skuldabréfa.
Íslenska krónan mun hafa einhver áhrif horft fram á við í erlendum eignum. Krónan er nokkuð sterk þessa dagana og margir á þeirri skoðun að hún eigi eftir að gefa aðeins eftir.
Niðurstaða
Innlend skuldabréf eru góður valkostur í dag og nú þegar vaxtalækkunarferlið hefur staðnæmst í bili þá eru enn tækifæri til að ná góðri ávöxtun í skuldabréfum til lengri tíma. Verðlagning innlendra hlutabréfa er hagstæð í samanburði við erlenda markaði en flæðismyndin truflar. Ef hún breytist þá geta hlutirnir breyst hratt til hins betra samanber þróun á hlutabréfamarkaði á fjórða ársfjórðungi síðasta árs.
Erlendir markaðir eru margir í hágildum og nú reynir á fyrirtækin að skila hagnaði sem réttlætir háa verðlagningu í ljósi hærri langtímavaxta víða. Seðlabankar helstu iðnríkja eru komnir í vaxtalækkunarferli eftir að vöxtum hefur verið haldið nokkuð háum sögulega á meðan verðbólga hefur verið á niðurleið. Þróun íslensku krónunnar getur haft veruleg áhrif á ávöxtun erlendar eigna í íslenskum krónum.