Helstu niðurstöður útboðs


Til að fá aðgang að gögnum þarftu að velja land og samþykkja skilmála

Veldu land

Hlutafjárútboð Íslandsbanka: Helstu niðurstöður


Reykjavík, 15. júní 2021.
Bankasýsla ríkisins, fyrir hönd Ríkissjóðs Íslands („seljandi“), og Íslandsbanki hf., tilkynna helstu niðurstöður hlutafjárútboðs Íslandsbanka. Útboðinu lauk á hádegi í dag.

Helstu atriði

  • Verð á hverjum útboðshlut er 79 kr. („útboðsverð“).
  • Fjöldi hluta sem seldir eru í útboðinu er 636.363.630, auk allt að 63.636.363 hluta, að því gefnu að valréttur til að mæta umframeftirspurn verði að fullu nýttur.
  • Heildarsöluandvirði útboðsins, á útboðsverðinu og að því gefnu að valréttir til að mæta umframeftirspurn verði nýttir að fullu, nemur 55,3 milljörðum króna eða 457 milljónum bandaríkjadala.
  • Um er að ræða stærsta frumútboð hlutabréfa sem farið hefur fram hér á landi.
  • Áætlað markaðsvirði Íslandsbanka, miðað við útboðsverð, er 158 milljarðar króna eða 1,3 milljarðar bandaríkjadala.
  • Margföld umframeftirspurn var í útboðinu á endanlegu útboðsverði og sýndu bæði almennir fjárfestar og fagfjárfestar útboðinu talsverðan áhuga en heildareftirspurn nam samtals 486 milljörðum króna eða um fjórum milljörðum bandaríkjadala.
  • Í samræmi við ákvæði lýsingar og aðrar réttarheimildir var við úthlutun leitast við að stuðla að dreifðu og fjölbreyttu eignarhaldi og að skerða ekki tilboð upp að einni milljón króna.
  • Upplýsingar um úthlutun hluta verða veittar eigi síðar en miðvikudaginn 16. júní 2021.
  • Fjöldi hluthafa eftir útboðið verður um 24 þúsund, sem er mesti fjöldi hluthafa allra skráðra fyrirtækja á Íslandi.
  • Í kjölfar útboðsins mun seljandi fara með 65% eignarhlut í Íslandsbanka, að því gefnu að valréttur verði að fullu nýttur. Gera má ráð fyrir að aðrir innlendir fjárfestar fari með um 24% og erlendir fjárfestar með um 11% af heildarhlutafé bankans.
  • Áætlað er að viðskipti með bréfin á Aðalmarkaði Nasdaq Iceland hefjist þriðjudaginn 22. júní 2021 kl. 9.30, undir auðkenninu „ISB“.
  • Bankinn og seljandinn hafa, í þágu umsjónaraðila útboðsins, skuldbundið sig til að selja ekki frekari hluti í bankanum í 180 daga eftir fyrsta viðskiptadag hlutabréfanna.
  • Citigroup Global Markets Europe AG, Íslandsbanki hf. og J.P. Morgan AG höfðu sameiginlega umsjón með útboðinu og voru leiðandi söluráðgjafar ásamt Barclays Bank Ireland PLC, HSBC Continental Europe, Fossum mörkuðum hf. og Landsbankanum hf. Arion banki hf. og Kvika banki hf. voru leiðandi söluaðilar ásamt Arctica Finance hf., Íslenskum fjárfestum hf. og Íslenskum verðbréfum hf. STJ Advisors Group Limited var ráðgjafi seljanda fyrir útboðið og ABN AMRO Bank N.V. var ráðgjafi Íslandsbanka.

Bjarni Benediktsson, fjármála- og efnahagsráðherra:

„Það er ánægjulegt að sjá niðurstöður úr vel heppnuðu útboði Íslandsbanka. Mikil eftirspurn og þátttaka almennings er sérstaklega ánægjuleg, en hluthafar í Íslandsbanka verða þannig flestir af öllum skráðum félögum á íslenskum markaði. Leiðir þetta ekki síst af þeirri ákvörðun að heimila áskriftir allt niður í 50 þúsund krónur og að láta áskriftir einstaklinga allt að einni milljón króna óskertar. Salan er ábatasöm fyrir ríkissjóð og kemur sér vel í þeirri uppbyggingu sem fram undan er næstu misseri. Mestu skiptir þó að við tökum hér fyrsta skrefið í að minnka áhættu ríkisins í bankarekstri og færumst nær heilbrigðara umhverfi líkt og þekkist á Norðurlöndum og öðrum nágrannaríkjum okkar.“

Lárus L. Blöndal, stjórnarformaður Bankasýslu ríkisins:

„Hlutafjárútboð Íslandsbanka er lokið í samræmi við áætlaða tímalínu. Þetta er mikilvægur áfangi í umsýslu Bankasýslu ríkisins á eignarhlutum ríkisins í fjármálafyrirtækjum sem þakka má miklum dugnaði allra hlutaðeigandi. Útboðinu var mjög vel tekið og var mikil eftirspurn frá fjölbreyttum hópi fjárfesta, bæði innanlands sem og erlendis. Það var ánægjulegt að sjá verulega eftirspurn frá almenningi sem mun gera hluthafahóp Íslandsbanka þann fjölmennasta á Nasdaq Iceland. Vonir standa til þess að þetta mikilvæga fyrsta skref greiði fyrir þeirri stefnu stjórnvalda um að selja allan eignarhlut í bankanum þegar hagfelld og ásættanleg skilyrði eru til staðar.“

Birna Einarsdóttir, bankastjóri Íslandsbanka:

„Við erum ánægð að sjá niðurstöður útboðsins sem marka þáttaskil í sögu bankans. Það var ánægjulegt að sjá þann mikla áhuga sem raungerðist og sýnir hann trú og traust á framtíðarsýn og stefnu Íslandsbanka og þeim tækifærum sem Ísland stendur frammi fyrir. Ég býð nýja hluthafa Íslandsbanka innilega velkomna.“

Tengi­lið­ir


Jó­hann Ottó Wat­hne


Fjárfestatengsl

Hafa samband844 4607

Björn Berg Gunn­ars­son


Samskiptasvið

Hafa samband844 4869