Drangar hf., móðurfélag Orkunnar, Lyfjavals og Samkaupa, lauk á dögunum árangursríkri hlutafjáraukningu. Markmið félagsins var að safna 3 milljörðum króna, en áskriftarloforð að fjárhæð 3,6 milljarða króna bárust. Dótturfélög Dranga reka samtals um 160 þjónustustaði um land allt. Útboðið markar spennandi tímamót fyrir samstæðuna og skapar rými fyrir fjárfestingar og úrbætur í rekstri. Niðurstaðan styður vel við framtíðarsýn Dranga og leggur grunninn að frekari vexti samstæðunnar.
Í tengslum við útboðið nýtti Íslandsbanki hf. kauprétt sem bankinn hafði vegna sölutryggingar og SKEL fjárfestingafélag hf. rétt til skuldbreytingar láns og seldu til fjárfesta. Verð í útboðinu var 12 krónur á hlut, sem jafngildir 24,3 milljarða króna virði hlutafjár fyrir aukningu. Útgáfa hlutafjár og uppgjör viðskipta er áætlað 9. desember nk. Fjárfestahópurinn samanstendur af innlendum stofnana- og fagfjárfestum, auk einkafjárfesta. Samhliða útboðinu var samþykktur hluthafasamningur sem kveður á um helstu áherslur í stjórnun og rekstri félagsins fram að fyrirhugaðri skráningu í Kauphöll árið 2027.
Við óskum Dröngum innilega til hamingju með þennan stóra áfanga og þökkum þeim fyrir samstarfið.
Umsjónaraðili útboðsins var Fyrirtækjaráðgjöf Íslandsbanka, Fossar fjárfestingabanki sá um söluráðgjöf og BBA//Fjeldco sá um lögfræðilega ráðgjöf. Íslandsbanki sölutryggði útboðið.