Næstkomandi áramót munu marka tímamót á alþjóðlegum fjármálamörkuðum þegar útgáfu og birtingu svokallaðra LIBOR (London Interbank Offered Rate) vaxta verður að mestu leyti hætt eftir margra ára undirbúningsvinnu fjölda aðila víða um heim. LIBOR vextir hafa verið ákvarðaðir á peningamarkaði með tvíhliða tilboðum (inn- og útlánsvaxtatilboðum) lykilbanka í hverju landi. Þær viðmiðanir sem leysa munu af hólmi eldri tilboðsvexti (LIBOR eða samsvarandi) verða í flestum tilvikum daglánavextir seðlabanka viðkomandi ríkja.
Um áramótin verður hætt að mynda LIBOR vaxtagildi á grundvelli tilboða fyrir svissneska franka, bresk pund og japönsk jen. Ákveðið var að fresta samsvarandi breytingu LIBOR vaxtagilda fyrir bandaríkjadali fram til loka júní 2023 en auk þess verða LIBOR vaxtagildi áfram birt fyrir bresk pund og japönsk jen a.m.k. út árið 2022 en undir breyttri aðferðafræði. Endanlega verður hætt að birta LIBOR vaxtagildi fyrir svissneska franka um áramótin.
Ljóst er að um allan heim eru enn í gildi samningar sem hafa að geyma tilvísanir til LIBOR vaxta og samningstími nær framyfir það tímamark þegar útgáfu og birtingu LIBOR vaxta í núverandi mynd verður hætt. Hluti af undirbúningsvinnu vegna þessara breytinga hefur því falist í því að ákvarða og mæla fyrir um hvaða vaxtaviðmið leysi LIBOR vexti af hólmi í slíkum samningum.
Nú liggur fyrir að samkvæmt breytingum á reglugerð Evrópusambandsins um fjárhagslegar viðmiðanir og undirgerðum sem Evrópusambandið hefur samþykkt, munu nánar tilgreind staðgönguvaxtaviðmið koma í stað LIBOR vaxta um áramótin í þeim samningum sem ekki hafa verið færðir yfir á aðra vexti. Þann 28. desember sl. samþykkti Alþingi breytingar á lögum um fjárhagslegar viðmiðanir, nr. 7/2021 vegna innleiðingar þeirra í íslenskan rétt. Breytingarlögin eru aðgengileg á vef Alþingis.
Samkvæmt framangreindum lagabreytingum taka umrædd staðgönguvaxtaviðmið beint við af þeim LIBOR viðmiðum sem falla brott, út líftíma viðkomandi samninga eða þar til aðilar semja sérstaklega um annað. Ekki er því sérstök þörf á að skilmálabreytingum vegna þeirra breytinga sem leiðir af lagasetningunni.
Vaxtaviðmið sem breytast um áramótin 2021/2022
Svissneskir frankar (CHF)
Á grundvelli fyrrnefndra lagabreytinga verða SARON vaxtaviðmið staðgönguvaxtaviðmið fyrir LIBOR-vaxtaviðmið í svissneskum frönkum . Þar sem mismunur var á SARON viðmiðunum og LIBOR CHF gildum fyrir tiltekin vaxtatímabil munu staðgönguvaxtaviðmiðin fela í sér fasta aðlögun (e. spread adjustment) sem var ákvarðað með hliðsjón af mismun á SARON og LIBOR CHF síðastliðin 5 ár. Frá og með 1. janúar 2022 munu SARON staðgönguvaxtaviðmið taka við af LIBOR-vaxtaviðmiðum fyrir svissneska franka samkvæmt eftirfarandi töflu: