Einstaklingsþjónusta eflist í Laugardal
Aukin áhersla verður lögð á einstaklingsþjónustu í útibúi bankans í Laugardal en auk almennrar bankaþjónustu verður húsnæðislánaþjónusta bankans framvegis staðsett þar frá og með 8. júní. Samhliða þessum breytingum sameinast útibúin á Höfða og Granda útibúinu í Laugardal, Suðurlandsbraut.
Á undanförnu ári hefur dregið úr heimsóknum í útibú um allt að 70% með aukinni notkun stafrænna lausna. Eftir sameiningar útibúa verða útibú bankans á höfuðborgarsvæðinu því í Norðurturni við Smáralind, Laugardal og Hafnarfirði.
Fyrirtækjamiðstöð í Norðurturni
Þjónusta við lítil- og meðalstór fyrirtæki á höfuðborgarsvæðinu verður frá og með 8. júní sameinuð í eina Fyrirtækjamiðstöð í Norðurturni, höfuðstöðvum Íslandsbanka. Fyrirtæki geta þó sem fyrr leitað í öll útibú fyrir einfalda bankaþjónustu. Íslandsbanki hefur verið leiðandi á markaði meðal lítilla- og meðalstórra fyrirtækja og er með mestu markaðshlutdeildina á höfuðborgarsvæðinu. Með þessu móti verður hægt að þjónusta fyrirtækin með enn sveigjanlegri hætti.
Birna Einarsdóttir, bankastjóri Íslandsbanka:
„Á undanförnum mánuðum hefur hegðun viðskiptavina breyst hratt og hefur COVID-19 flýtt þeirri þróun. Við sjáum mikið færri heimsóknir í útibú á sama tíma og notkun í appi margfaldast. Við leggjum áfram áherslu þróun stafrænna lausna við einföld bankaviðskipti en viljum tryggja persónulega ráðgjöf við stærri ákvarðanir. Ný þjónusta fyrir eldri borgara hefur svo sannarlega fengið góðar viðtökur og munum við halda áfram á þeirri braut. Með Fyrirtækjamiðstöð í Norðurturni og með öflugri einstaklingsþjónustu í Laugardal náum við auknum slagkrafti í þjónustu bankans.“