Ævintýraheimur Tulipop

Helga og Signý settu markið hátt en tóku sér þó góðan tíma í að þróa vörumerkið.

„Stóra hugmyndin var fyrst að búa til íslenskt hugverk, íslenskan ævintýraheim sem hefði möguleika á að ná árangri alþjóðlega. Það tók okkur dágóðan tíma að finna út hver markaðstækifærin væru og hvernig við ættum að framkvæma það sem við stefndum á. Tulipop heimurinn er innblásinn af vinum og vandamönnum, nátttúru, sveppum, Grimmsbræðrum, Lindgren og litum. Þar búa fimm ólíkir og skemmtilegir vinir, sem lenda stöðugt í alls kyns ævintýrum og í öllum sögunum eru undirliggjandi jákvæð skilaboð um vináttuna, samvinnu og fjölbreytileikann.“

Helga segist ánægð með að hafa tekið sér tíma í undirbúning.

Um leið og myndheimurinn var tilbúinn hóf Tulipop framleiðslu á varningi.

„Þarna voru við enn þá bara tvær og þurftum að finna leiðir til þess að fá tekjuflæði inn í fyrirtækið. Það varð úr að innan þriggja mánaða frá stofnun Tulipop kynntum við okkar fyrstu vörulínu á Hönnunarmars. Við þurftum að vera úrræðagóðar, starfandi á Íslandi og með kröfu um þokkalega framlegð af hverri vöru. Við enduðum á að framleiða litla línu af pappírsvörum. Samhliða því fórum að þróa viðskiptaáætlun, sækja um alla styrki og skoða tækifæri fyrir aðrar vörur.“

„Við notuðum afraksturinn af hverju verkefni til þess að fjárfesta í næsta og bæta við vörulínuna. Þá vorum við búnar að afla okkur þekkingar og tengsla til framleiðslu utan landsteinanna. Það var heilmikið lærdómsferli út af fyrir sig, að læra hvernig maður finnur góða framleiðendur, tryggir að gæðin séu góð, vörurnar öruggar og hægt sé að flytja þær með hagkvæmum hætti til Íslands“

Samhliða því fóru þær að þróa sögurnar um vinina og persónueinkenni hvers og eins.

„Við byrjuðum að gefa út eina Tulipop bók og á endanum fengum við inn fjárfesti, einkaaðila og fjárfestingarsjóð. Þá vorum við komin með nægt fjármagn til þess að skoða möguleikann á framleiðslu teiknimynda og gefa út fleiri bækur.“

Stærstu tímamótin í rekstarsögu Tulipop voru þegar framleiðsla hófst á hágæða íslensku barnaefni árið 2020, sem fór í dreifingu ári seinna víða um heim. Starfsmenn fyrirtækisins eru nú orðnir sex hér á landi en hátt í hundrað manns koma að framleiðslu þáttaraðarinnar.

„Nú stefnum við á að klára fimmtíu og tvo þætti fyrir fyrri hluta næsta árs. Svona þáttaröð getur verið að seljast í fimm til tíu ár. Auk þess erum við að undirbúa næstu framleiðslu og vinna í því hvernig við getum nýtt vinsældir barnaefnisins til þess að koma varningi í sölu um allan heim. Í Póllandi er þetta eitt vinsælasta barnaefnið og við erum í viðræðum við erlenda aðila um hvernig við getum komið varningi í verslanir, nú þegar hugverkið er orðið þekkt. Gott barnaefni eykur áhugann á öllum varningi og tækifærin eru endalaus fyrir Tulipop.“

Helga segir það algjöra rússíbanareið að stofna nýsköpunarfyrirtæki og að hindranirnar á leiðinni séu margar.

„Suma daga gengur allt upp og aðra ekkert. Það hefur vissulega verið þrautin þyngri að koma teiknimyndaverkefnum á koppinn og það kemur ýmislegt upp á. Maður heldur kannski að maður sé búinn að ná draumasamningi sem mikil vinna hefur farið í en svo gengur það ekki alltaf upp og þá þarf maður að byrja upp á nýtt.“

Hún segir fjármögnun alltaf vera stóra áskorun fyrir fyrirtæki sem eru að byrja en að hún sé þakklát Íslandsbanka fyrir trúnna á fyrirtækinu frá byrjun.

„Við erum búnar að vera viðskiptavinir Íslandsbanka frá upphafi. Við höfum leitað til þeirra með ýmislegt í gegnum árin, þar á meðal beiðnir og fyrirspurnir sem þóttu óvenjulegar og tíðkuðust kannski ekki í þessum geira.“