Starfað í samræmi við viðeigandi regluverk

Íslandsbanki er fjármálafyrirtæki og starfar í samræmi við viðeigandi regluverk á sviði fjármálamarkaða sem rammar inn stjórnarhætti hans. Meðal þeirra laga sem um starfsemi bankans gilda eru lög um fjármálafyrirtæki nr. 161/2002, lög um skilameðferð lánastofnana og verðbréfafyrirtækja nr. 70/2020, lög um markaði fyrir fjármálagerninga nr. 115/2021, lög um greiðsluþjónustu nr. 120/2011, lög um aðgerðir gegn peningaþvætti og fjármögnun hryðjuverka nr. 140/2018, lög um fasteignalán til neytenda nr. 118/2016, lög um neytendalán nr. 33/2013, samkeppnislög nr. 44/2005 og lög um hlutafélög nr. 2/1995 sem ásamt samþykktum bankans mynda grunninn að starfsemi hans.

Regluvarsla

Regluvarsla hefur eftirlit með hlítingaráhættu bankans og sinnir verkefni sínu á grundvelli áhættumats sem mótar áhættumiðaða og skilvirka eftirlits- og fræðsluáætlun. Regluvarsla veitir ráðgjöf og fræðslu, framkvæmir prófanir og úttektir til viðbótar við daglegt eftirlit þar sem m.a. er stuðst við eftirlitskerfi. Þá gefur Regluvarsla reglulega skýrslur til stjórnar og viðeigandi nefnda bankans um mat á stöðu hlítingaráhættu. Allt miðar þetta að því að stuðla að eðlilegum og heilbrigðum viðskiptaháttum, koma í veg fyrir háttsemisbrot, markaðsmisnotkun og innherjaviðskipti auk þess að vinna gegn öðrum fjármunabrotum, líka og peningaþvætti og fjármögnun hryðjuverka og brotum gegn persónuvernd. Regluvarsla Íslandsbanka er sjálfstæð eftirlitseining á annarri varnarlínu og heyrir beint undir bankastjóra.

Endurskoðun

Innri endurskoðandi er ráðinn af, og heyrir beint undir, stjórn og er ábyrgur fyrir innri endurskoðun innan samstæðunnar. Innri endurskoðun starfar sjálfstætt frá öðrum deildum bankans í samræmi við 16. gr. laga um fjármálafyrirtæki nr. 161/2002. Innri endurskoðun veitir stjórn bankans óháða og hlutlæga staðfestingu á því hvort ferli bankans varðandi áhættustýringu, innra eftirlit og stjórnarhætti séu fullnægjandi. Nánar er gerð grein fyrir skyldum og heimildum innri endurskoðunar í erindisbréfi frá stjórn.

Á aðalfundi bankans árið 2024 var KPMG ehf. kjörið sem endurskoðendafélag bankans.