Ný tækni í hjólreiðum

Ný tækni í hjólreiðum
Næstu árin fóru í að þróa fjölmargar frumgerðir af gafflinum og árið 2014 kom fyrsti gaffall Lauf á markað.  Gaffallinn fékk mikið lof þrátt fyrir að þykja skrítinn, enda algjörlega ný tækni.

Salan á gafflinum gekk ágætlega til að byrja með en fljótlega varð ljóst að þetta viðskiptamódel gæti ekki gengið upp í óbreyttri mynd til lengdar. Síðla árs 2017, kom næsta afurð Lauf Cycles á markað, malarhjólið True Grit, sem hlaut einróma lof hjá erlendum hjólamiðlum.

,,Þá tók við óhefðbundin markaðssetning í Bandaríkjunum, þar sem sölufólkið okkar ferðaðist á milli hjólabúða til að vekja athygli á vörunni og einstökum eiginleikum hennar. Þessar ferðir urðu til þess að vörumerkið Lauf komst á kortið með framúrskarandi vöru á ört stækkandi markaði fyrir malarhjólreiðar sem voru að ryðja sér til rúms á þessum tíma.“

Í ársbyrjun 2019 kom næsta hjól Lauf á markað, malarhjólið Anywhere, það var með stífum gaffli en með sérhönnuðu stýri. Á þeim tíma var Lauf Cycles farið að selja vörur sínar í yfir hundrað verslunum í Bandaríkjunum en í júlí 2020 var tekin ákvörðun um að umbylta viðskiptalíkaninu, hætta að selja í gegnum hjólabúðir og hefja sölu milliliðalaust í gegnum heimasíðu félagsins.

„Við þessar breytingar má segja að félagið hafi hætt að brenna pening og reksturinn fór að vera réttu megin við núllið.“

Miklar breytingar nýverið

Í október síðastliðnum kom svo fyrsta götuhjól Lauf Cycles út en hugmyndin að hjólinu kviknaði við hönnun True Grit.

„Við ákváðum að fara alveg nýjar leiðir í hönnuninni og höfnuðum viðteknum gildum í hönnun götuhjóla. Fyrstu viðbrögð hjólasamfélagsins hafa verið framar væntingum og við hlökkum til framhaldsins.“

Fyrr á þessu ári opnaði Lauf auk þess vöruhús og dreifimiðstöð í Bandaríkjunum þar sem hjólin eru sett saman.

,,Með því að komast nær okkar stærsta markaði getum við veitt mun betri og skilvirkari þjónustu“ bætir Hallgrímur við.

Hindranir á veginum

Hallgrímur segir ferlið frá hugmynd að sölu á fullmótaðri vöru geta verið krefjandi og margt sem þurfi að breyta og bæta á leiðinni.

Hann segir að fjármögnun félagsins hafi oft gengið erfiðlega og það hafi verið áskorun að fá fjárfesta til þess að hafa nægilega trú á verkefninu.

„Við fundum fyrir því að það skorti ákveðna trú hjá fjárfestum hérlendis að íslenskt fyrirtæki gæti verið að framleiða hjól í heimsklassa. Við höfum þurft að sanna okkur og að okkur sé alvara og við erum afar þakklát þeim fjárfestum sem hafa stutt við félagið í gegnum tíðina.“

Það hefur margt breyst í rekstrarumhverfi nýsköpunarfyrirtækja og hafa stjórnvöld hafa gert þónokkuð til þess að ýta undir jákvæða þróun fyrir fyrirtæki í nýsköpun. Það má þó gera enn betur í þeim málum.