Á sama tíma og Seðlabankinn birti tölur fyrir október voru tölur fyrir septembermánuð uppfærðar. Kom í ljós að vöxtur kortaveltu innanlands í september var meiri en áður var haldið fram. Það má því segja að neysla Íslendinga sé að glæðast með hverjum mánuðinum og þá sérstaklega á erlendri grundu. Það sést greinilega í tölum Rannsóknarseturs verslunarinnar (RSV) þar sem velta í flokknum Ferðaskrifstofur og skipulagðar ferðir var ríflega tífalt meiri í október en á sama tíma í fyrra og greinilegt að ferðahugur landans er mikill um þessar mundir.

Vöxtur einkaneyslu í kortunum?

Þessar tölur gefa góð fyrirheit um stöðu einkaneyslu hér á landi þar sem kortaveltan gefur alla jafna góða vísbendingu um þróun einkaneyslunnar. Einkaneysla dróst saman um 3% í fyrra að raunvirði frá árinu á undan en á fyrri helmingi þessa árs hefur hún aukist um 5%. Það verður því áhugavert að sjá þróunina á einkaneyslunni á þriðja ársfjórðungi en Hagstofan mun birta þjóðhagsreikninga fyrir þann ársfjórðung í lok þessa mánaðar. Miðað við kortaveltutölur undanfarna mánuði má ætla að einkaneyslan haldi áfram að vaxa það sem eftir lifir árs.

Aðrir hagvísar benda einnig til þess að einkaneysluvöxtur sé í vændum. Væntingavísitala Gallup mælist há, atvinnuleysi fer minnkandi og kaupmáttur launa hefur vaxið töluvert á þessu ári þrátt fyrir verðbólgu. Þá er eignastaða flestra heimila sterk ásamt því að sparnaður jókst töluvert í faraldrinum. Við teljum að vegna þessa að neysluvilji almennings sé töluverður og þar með eigi einkaneyslan talsvert inni eftir hápunkt faraldursins.