Íslandsbanki ráðgjafi við sölu Festingar til Eikar

Festing hf., sem á og rekur um 43 þúsund fermetra af atvinnuhúsnæði á Íslandi, hefur undirritað kaupsamning við Eik fasteignafélag hf. um sölu á öllu hlutafé félagsins. Seljendur eru félögin Blue Ocean B.V. og SMT Partners B.V., eigendur Festingar.

Eignasafn Festingar samanstendur af 12 fasteignum sem hýsa starfsemi Samskipa hf. hér á landi. Heildarvirði samningsins er 15.070 milljónir króna. Viðskiptin eru háð ákveðnum skilyrðum, þ.m.t. samþykki Samkeppniseftirlitsins, og er áætlað að þau gangi formlega í gegn á næstu misserum.

Fyrirtækjaráðgjöf Íslandsbanka gegndi lykilhlutverki sem ráðgjafi seljenda og lögfræðiráðgjöf var í höndum LOGOS.

Eik fasteignafélag hyggst nýta eignasafnið til að efla stöðu sína á fasteignamarkaði. Gert er ráð fyrir að samruninn skili árlegum EBITDA-áhrifum upp á 1.130–1.140 milljónir króna, miðað við verðlag í júní 2025.

Ráðgjafar Eikar í viðskiptunum voru Arctica Finance og Venture Legal ehf.