Morgunkorn Íslandsbanka

Ferðamenn: Sama ótrúlega sagan í nóvember

10.12.2013

nullNóvember síðastliðinn  var langfjölmennasti nóvembermánuður frá upphafi mælinga hvað erlenda ferðamenn varðar. Alls námu brottfarir erlendra ferðamanna um Flugstöð Leifs Eiríkssonar (FLE) um 46.500 talsins í nóvember sl. samanborið við 37.000 á sama tíma í fyrra. Jafngildir þetta 25,7% aukningu á milli ára. Þetta eru hreint ótrúlegar tölur, og sér í lagi í ljósi þess hversu gríðarlega mikil aukning átti sér stað í nóvember í fyrra á milli ára, eða sem nemur um 61%. Þetta þýðir að erlendir ferðamenn voru meira en tvöfalt fleiri í nóvember í ár en í nóvember árið 2011. Þetta má sjá í gögnum sem Ferðamálastofa Íslands birti yfir brottfarir um FLE sl. föstudag.

Ekki hægt að rekja til Airwaves

Aukningin í fyrra skýrðist að hluta til af því að Iceland Airwaves fór fram í nóvember það ár en í október árið 2011, en þó var ljóst að þrátt fyrir að fjöldatölur um erlenda gesti Airwaves væru teknar út fyrir sviga var samt um mikla aukningu að ræða. Sem kunnugt er fór Iceland Ariwaves fram í nóvember í ár líkt og í fyrra.

Ferðaþjónustan að drífa vöxtinn

nullVart þarf að taka fram að ofangreindar tölur skipta orðið miklu máli, enda eru umsvif ferðaþjónustunnar í hagkerfinu orðin mun meiri en þau voru áður. Er hér nærtækast að benda á tölur Hagstofu Íslands frá því á föstudag sem sýndu að hagvöxtur á fyrstu níu mánuðum ársins var að miklu leyti drifinn áfram af auknum tekjum í ferðaþjónustu. Einnig má nefna að það sem af er ári nemur þjónustuútflutningur 39% af heildarútflutningi vöru og þjónustu, en árið 2011 var þetta hlutfall 35%.

Það sem af er ári hafa rúmlega 739.300 erlendir ferðamenn farið frá landinu um FLE, og jafngildir það 19,5% aukningu frá sama tímabili í fyrra. Eru brottfarir erlendra ferðamanna orðnar 14,3% fleiri fyrstu ellefu mánuðum ársins og þær voru allt árið í fyrra, en þá voru þær rúmlega 646.900 talsins.

Ferðahugur í landanum

nullMun fleiri Íslendingar lögðu land undir fót í nóvember sl. en á sama tíma í fyrra. Alls voru brottfarir Íslendinga um FLE 28.800 talsins í nóvember sl., sem er aukning upp á 9,9% frá því í nóvember í fyrra. Þetta er sama sagan og var upp á teningnum í september og október, þó aukningin sé heldur meiri í þetta sinn. Virðist því áfram vera töluverður ferðahugur í landanum eftir dapurt sumar veðurfarslega séð. Það sem af er ári hafa 340.500 Íslendingar haldið af landi brott, sem er 1,1% aukning frá sama tímabili í fyrra.

Fannst þér efnið á síðunni hjálplegt?
Afhverju ekki?
Hætta við

Ábending þín er notuð til að bæta gæði þjónustu og upplýsinga á vef Íslandsbanka. Vantar þig aðstoð sem krefst þess að við svörum þér má hafa samband við Þjónustuver Íslandsbanka.

Netspjall