Íslandsbanki býður unglingum á leikritið Hvað Ef?

Íslandsbanki og 540 gólf - Leikhús hafa gert með sér samstarfssamning um sýningar á Hvað Ef? - skemmtifræðsla á komandi leikári. Þjóðleikhúsið leggur til aðstöðuna en sýnt verður í Kassanum. Sýningin hefur hlotið einmuna lof unglinga, foreldra, kennara og þeirra sem hafa unnið við forvarnir og fræðslu en tæplega 20.000 unglingar, foreldrar og kennarar hafa séð leikritið frá árinu 2005.

Íslandsbanki hefur ákveðið að bjóða grunnskólum, foreldrafélögum, mennta- og fjölbrautarskólum á sýningar á komandi vetri. Um 35 sýningar er um að ræða.

Hvað Ef? - skemmtifræðsla er leiksýning sem notast við leik, söng, ljóð og tónlist til fræðslu. Þar er á mjög nýstárlegan og skemmtilegan hátt farið yfir kaldar staðreyndir varðandi neyslu vímuefna, eineltis, sjálfsmorða og fleira. Markmiðið er að sýna unglingum fram á að þeir hafi val, og að sakleysislegar skyndiákvarðanir geta haft alvarlegar afleiðingar í för með sér.

„Sú hugmynd að nota galdra góðs leikhúss til að koma á framfæri fræðslu til unglinga og fullorðinna er mikils virði. Verðmætið eykst til muna þegar sterkir aðilar koma slíkri hugmynd í framkvæmd. Ég vil þakka Þjóðleikhúsi og Íslandsbanka fyrir að leggja málefninu lið og gera þetta mögulegt."

„Unga fólkið okkar er einhver mikilvægasta auðlind sem við eigum. Því miður hefur fjárskortur bitnað á forvarnarfræðslu undanfarin ár og því mikilvæga málefni ekki sinnt sem skildi. Það er því mikið ánægjuefni, á sjálfan forvarnardaginn, að undirrita þennan samstarfssamning. Íslandsbanki er bakhjarl þessa frábæra leikrits og vonar að sem flest ungmenni sjái leikritið á komandi leikári."

Eldri fréttir

Netspjall