Tilkynning frá samstarfshópi um úrvinnslu gengistryggðra lána

Samstarfshópur á vegum fjármálafyrirtækja og fulltrúa lánþega um úrvinnslu gengistryggðra lána hefur sent frá sér tilkynningu þar sem fram kemur að búið sé að greina um 20 álitaefni sem nauðsynlegt er að láta reyna á fyrir dómi svo hægt sé að hefja endurútreikning lána sem falla undir dóm Hæstaréttar frá því í febrúar.

Næsta skref samstarfsins er að velja mál sem hentug eru til þess að bera undir dómstóla. Líklegt er að höfða þurfi fimm til tíu mál og verður óskað eftir flýtimeðferð hjá dómstólum. Vonast er til að dómar Hæstaréttar í fyrstu málunum geti legið fyrir í haust.