Íslandsbanki og Keldan í samstarf um markaðsupplýsingar

Á nýjum vef Íslandsbanka má finna yfirlitssíðu um íslenska fjármálamarkaðinn. Þessi síða er birt í samvinnu við Kelduna sem er í fararbroddi í birtingu markaðsupplýsinga. Á vefnum eru upplýsingar um viðskipti hlutabréfa og skuldabréfa, yfirlit um sjóði Íslandsbanka, gengi gjaldmiðla, stýrivexti Seðlabanka og millibankavexti (libor). Enn fremur er birt yfirlit viðskiptafrétta úr öllum helstu miðlum auk dagatals viðskiptalífsins þar sem er að finna yfirlit yfir viðburði í viðskiptalífinu og útgáfudaga á ýmsum upplýsingum frá m.a. Seðlabanka Íslands, Hagstofunni og Vinnumálastofnun. 

Friðrik Guðjónsson, framkvæmdastjóri Keldunnar:

“Íslandsbanki hefur lengi stutt vel við bakið á íslenskum sprotafyrirtækjum og erum við hjá keldan.is afar ánægð með þetta samstarf. Nýi vefurinn hefur fengið frábærar viðtökur, ekki síst dagleg uppfærsla á sjóðum rekstrarfélaganna og dagatal viðskiptalífsins sem gefur fólki færi á að fylgjast vel með viðburðum og útgáfu á hinum ýmsu upplýsingum. Það er greinileg eftirspurn eftir markaðsupplýsingum og munum við halda áfram að þjónusta almenning eins vel og mögulegt er með því að setja upplýsingarnar skilmerkilega fram á einum stað.“ 

Sigurjón Ólafsson, deildarstjóri vefmála og netbanka Íslandsbanka: 

"Við erum mjög ánægð með samstarfið við Kelduna sem sérhæfir sig í þróun og birtingu markaðsupplýsinga. Núna getum við boðið viðskiptavinum okkar og öðrum notendum vefsins upp á öfluga markaðssíðu með öllum helstu upplýsingum á einum stað sem áður þurfti að sækja á mörgum mismunandi síðum. "

Til baka