Íslandsbanki og Byr sameinast á Akureyri

Í dag sameinast útibú Íslandsbanka og Byrs á Akureyri undir merkjum Íslandsbanka. Er þetta fjórða sameining útibúa bankanna, en áður hafa sameinast útibúin í Reykjanesbæ, Kópavogi og í Hraunbæ. Sameinað útibú mun fyrst um sinn starfa í húsnæði Byrs að Skipagötu 9, þar sem unnið verður að endurbótum á húsnæði Íslandsbanka að Skipagötu 14 næstu vikurnar. Stefnt er að því að þeim ljúki í mars og mun útibúið þá flytja aftur á Skipagötu 14.

Útibússtjóri sameinaðs útibús verður Ingi Björnsson, núverandi útibússtjóri Íslandsbanka. Sigrún Skarphéðinsdóttir verður viðskiptastjóri einstaklinga, en hún hefur sinnt því starfi hjá Byr, og Rúnar Þór Sigursteinsson verður viðskiptastjóri fyrirtækja.

Útibúið verður opið til kl. 18 í dag í tilefni sameiningarinnar og verður boði uppá kaffi og veitingar fyrir viðskiptavini.