Ríflega 200 eldri borgarar mættu á fræðslufund VÍB og LEB

VÍB, eignastýringarþjónusta Íslandsbanka, og Landssamband eldri borgara, LEB, hafa áður leitt hesta sína saman. Á síðasta ári héldu VÍB og LEB fundi um allt land og var eftirspurnin mikil því nánast fullt var út úr dyrum á alla fundina. Alls sóttu hátt á annað þúsund eldri borgarar þessa fundi. Í dag voru svo ríflega 200 eldri borgarar mættir á Hilton Reykjavík Nordica til að hlýða á erindi Jónu Valgerðar Kristjánsdóttur, formanns LEB, og Björns Berg Gunnarssonar, fræðslustjóra VÍB.

Leitast var við að svara algengustu spurningum sem brenna á eftirlaunaþegum, meðal annars sem snúa að öryggi, ávöxtun, sköttum og greiðslum Tryggingarstofnunar. Björn Berg fór meðal annars yfir þær breytingar sem hafa verið gerðar frá hruni á skattlagningu og hafa áhrif á eldri borgara og talaði um áhættu og ávöxtunarmöguleikum á þeim fjárfestingakostum sem eru í boði í dag.

Vegna mikillar eftirspurnar var ákveðið að halda annan fund næsta þriðjudag. Sá fundur varð fljótt fullbókaður og því hefur þriðja fundinum verið bætt við næsta fimmtudag. Nánari upplýsingar eru á vef VÍB, www.vib.is.