Fyrirtækjaráðgjöf Íslandsbanka hf. hefur verið falið að annast ráðgjöf og formlegt ferli sem lýtur að mögulegri sölu á Steypustöðinni ehf., sem er í dag að fullu í eigu Miðengis, dótturfélags Íslandsbanka hf. Fyrirspurnir vegna söluferlisins berist til Fyrirtækjaráðgjafar Íslandsbanka hf. á netfang steypustodin2009@islandsbanki.is.

Söluferlið verður opið öllum áhugasömum fjárfestum sem uppfylla skilyrði til þess að geta talist fagfjárfestar samkvæmt lögum nr. 108/2007 um verðbréfaviðskipti, einstaklingum sem hafa verulegan fjárhagslegan styrk og viðeigandi þekkingu, auk fyrirtækja sem höfðu eiginfjárstöðu sem var hærri en sem nemur 300 m.kr. í árslok 2008. Seljandi áskilur sér þó rétt til þess að takmarka aðgang að söluferlinu í þeim tilvikum þegar fyrir hendi eru lagalegar takmarkanir á því að fjárfestir eignist ráðandi hlut í félaginu, svo sem vegna samkeppnisreglna.

Áhugasamir fjárfestar þurfa að fylla út trúnaðaryfirlýsingu ásamt því að leggja fram umbeðnar upplýsingar og nauðsynleg gögn sem staðfesta að ofangreind skilyrði séu uppfyllt. Framangreindu skal skilað til Fyrirtækjaráðgjafar Íslandsbanka í samræmi við neðangreindar upplýsingar um skil gagna og tilboða. Móttaka trúnaðaryfirlýsinga og viðeigandi gagna hefst föstudaginn 20. nóvember og er síðasti frestur til að skila inn framangreindu vegna þátttöku í söluferlinu fimmtudagurinn 26. nóvember kl. 16:00.

Uppfylli fjárfestar ofangreind skilyrði fá þeir sölugögn afhent á tímabilinu 23.-27. nóvember. Sölugögnin eru afhent með rafrænum hætti á netfang sem fjárfestar tilgreina í trúnaðaryfirlýsingu. Gert er ráð fyrir að skuldbindandi tilboðum með sérstaklega tilgreindum fyrirvörum sé skilað til Íslandsbanka, miðvikudaginn 2. desember 2009, fyrir kl. 16:00, í lokuðu umslagi merkt í samræmi við neðangreindar upplýsingar um skil gagna og tilboða.

Þeim fjárfestum sem leggja fram hæstu tilboðin og sýna fram á fjárhagslega burði til að standa við tilboðin, verður boðið til áframhaldandi þátttöku í söluferlinu. Fá þeir þá afhent drög að kaupsamningi ásamt aðgangi að nánari upplýsingum um starfsemi og fjárhag fyrirtækisins. Endanlegum tilboðum, án fyrirvara, ber að skila í síðasta lagi miðvikudaginn 16. desember 2009, fyrir kl. 16:00, í lokuðu umslagi merkt í samræmi við neðangreindar upplýsingar um skil gagna og tilboða. Öll tilboð verða opnuð í viðurvist óháðs aðila.

Gögn er snúa að þátttöku í söluferlinu

Eftirfarandi er yfirlit yfir þau gögn sem áhugasamir fjárfestar þurfa að skila inn til þess að öðlast rétt til þátttöku í söluferlinu:

I. Allir áhugasamir fjárfestar þurfa að skila inn trúnaðaryfirlýsingu. Form trúnaðaryfirlýsingar má nálgast hér.

II. Lögaðilar og einstaklingar þurfa að skila inn þeim upplýsingum sem tilgreindar eru í eftirfarandi skjölum:

• Einstaklingar
• Lögaðilar

III. Þátttaka í útboðinu fæst gegn einu af eftirfarandi skilyrðum og þurfa áhugasamir fjárfestar að skila inn gögnum því til staðfestingar að þeir uppfylli skilyrði a.m.k. eins af neðangreindum flokkum:

• Fagfjárfestar. Fjárfestar sem uppfylla skilyrði til þess að geta talist fagfjárfestar samkvæmt lögum nr. 108/2007 um verðbréfaviðskipti.
• Aðrir einstaklingar. Einstaklingum sem hafa verulegan fjárhagslegan styrk og viðeigandi þekkingu.
• Aðrir lögaðilar. Fyrirtæki sem höfðu eiginfjárstöðu sem var hærri en sem nemur 300 m.kr. í árslok 2008.

Skil gagna og tilboða

Öllum gögnum vegna söluferlisins skal skilað til Íslandsbanka, innan tilgreindra tímamarka, í lokuðu umslagi, merkt:

Íslandsbanki hf.
Kirkjusandi
155 Reykjavík
Fyrirtækjaráðgjöf/Steypustöðin2009

Athygli er vakin á því að ekki er tekið við tilboðum á rafrænu formi.

Eftirfarandi sýnir tímalínu og meginþætti söluferlisins