Uppskipting eigna Sjóðs 1

Vegna aðstæðna sem hafa skapast á fjármálamörkuðum frá upphafi októbermánaðar 2008, sem leiddi m.a. til setningar laga nr. 125/2008, hafa Íslandssjóðir ákveðið að skipta eignum sjóðsins í tvo flokka, flokk 1A og flokk 1B. Verður flokki 1B í framhaldinu slitið, eignir seldar og greiddar út. Flokkur 1A mun starfa áfram en lokað verður fyrir innlausn í sjóðnum til 30. janúar 2010. Þeir fjárfestar sem veittu skriflegt samþykki sitt í janúar 2009 fluttust yfir í flokk 1A en allir aðrir fjárfestar fluttust sjálfkrafa yfir í flokk 1B. Í júlí 2009 gafst þeim hlutdeildarskírteinishöfum sem enn voru í flokk 1A kost á að flytja hluta eða alla eign sína úr flokki 1A yfir í flokk 1B gegn skriflegri beiðni. Skipting á eignum sjóðsins milli flokka 1A og 1B skal vera hlutfallsleg miðað við fjölda útgefinna eininga í hvorum flokki þannig að þess verði gætt að eignasamsetning hvors flokks verði óbreytt.

Upplýsingablað

Flokkur 1A mun starfa áfram á sama grunni og sjóðurinn hefur starfað fram að þessu. Sjóðnum verður stýrt í samræmi við markmið og fjárfestingastefnu sjóðsins. Lokað er tímabundið fyrir innlausn í sjóðnum til 30. janúar 2010. Þó er sjóðnum heimilt sbr. 27. gr. laga nr. 30/2003 að fresta innlausn frekar ef markaðsaðstæður eru með þeim hætti að ólíklegt sé að sjóðurinn geti mætt innlausn með sölu eigna og hagsmunir hlutdeildarskírteinishafa krefjast þess.

Fjárfestingarmarkmið

Markmið Sjóðs 1 er langtíma hækkun eigna með því að fjárfesta í skuldabréfum eða öðrum fjármálagerningum tengdum skuldabréfum.

Eignir sjóðsins skulu ávaxtaðar í skuldabréfum, en einnig er heimilt að fjárfesta í innlánum banka. Hlutfall ríkisskuldabréfa, skuldabréfa útgefnum af eða með ábyrgð ríkisins eða sveitarfélaga, ríkisvíxla, bankavíxla, innlána og skuldabréfa með bankaábyrgð skal ekki vera lægra en 35%.

Sjóðnum er heimilt, skv. 2. mgr. 31. gr. laga nr. 30/2003, að eiga til skamms tíma allt að 10% í lausu fé séu markaðsaðstæður ekki heppilegar til fjárfestinga vegna fjár sem hefur fengist með sölu hlutdeildarskírteina eða vegna sölu eigna sjóðsins. Framangreint fé er ekki hluti af fjárfestingarstefnu sjóðsins. Jafnframt er sjóðnum heimilt skv. 2. mgr. 40. gr laga nr. 30/2003 að taka skammtímalán til að mæta innlausnum. Slík lán mega ekki nema meira en 10% af heildareignum sjóðsins. Sjóðnum er einnig heimilt að fjárfesta í fjármálagerningum tengdum skuldabréfum, þ.e. afleiðum, en að hámarki 10% af heildareignum.

Almennur fyrirvari

Skattlagning
Skattlagning hlutdeildarskírteina fer eftir lögum um tekjuskatt nr. 90/2003 og lögum um staðgreiðslu skatts á fjármagnstekjur nr. 94/1996. Skv. breytingu á lögum 94/1996 með bráðabirgðaákvæði í lögum 70/2009 ber að greiða 15% fjármagnstekjuskatt af jákvæðum mismun söluverðs hlutdeildarskírteinis að frádregnu kaupverði og þóknun frá 1. júlí 2009 til 31. desember 2009. Frá 1. janúar 2010 ber að greiða 18% fjármagnstekjuskatt af jákvæðum mismun söluverðs hlutdeildarskírteinis að frádregnu kaupverði og þóknun.

Fjárfesting í afleiðum
Sjóðnum er heimilt að nota afleiður til að fastsetja hagnað eða til að draga úr áhættu, eða til að festa verð á skuldabréfum vegna fyrirsjáanlegra innlausna eða til að bregðast við markaðsaðstæðum, enda sé það hluti af fjárfestingarstefnu sjóðsins. Fjárfestum er bent á nánari útskýringar á beitingu afleiðna er að finna í útboðslýsingu sjóðsins.

Fjárfestingu í verðbréfasjóðum fylgir ávallt fjárhagsleg áhætta. Eignarhlutdeild í verðbréfasjóði getur rýrnað, aukist eða staðið í stað og ber m.a. að hafa í huga áhættu vegna efnahagsástands, alþjóðlegra fjárfestinga auk gengisflökts gjaldmiðla þegar eignir sjóðs eru í erlendum gjaldmiðlum. Bent skal á að ávöxtun í fortíð er hvorki vísbending um né trygging fyrir ávöxtun í framtíð. Fjárfestingarmarkmið og fjárhagsstaða fjárfesta eru mismunandi. Þeim aðilum sem hafa hug á viðskiptum er bent á að leita sér sérfræðilegrar ráðgjafar og kynna sér vel hina ýmsu fjárfestingakosti sem í boði eru. Fjárfestar eru hvattir til að kynna sér útboðslýsingu sjóðsins, sérstaklega umfjöllun um áhættur, sjá nánar undir Ítarefni hér að ofan.

Gengisþróun og ávöxtun
Í línuriti gengisþróunar er birt gengi viðkomandi sjóðs sl. eitt ár. Ef sjóður er ekki orðinn ársgamall er birt gengissaga frá stofnun hans. Nafnávöxtun tímabila sem eru styttri en eitt ár er ekki reiknuð upp á ársgrundvöll heldur er þar um gengisbreytingu að ræða. Nafnávöxtun tímabila sem ná yfir eitt ár og meira er reiknuð yfir á ársgrundvöll. Uppreikningur ávöxtunar miðast ávallt við síðasta skráða gengi og er í grunnmynt hvers sjóðs.

Tekið skal fram að umfjöllun þessi er aðeins birt í upplýsingaskyni og skal því ekki litið á hana sem ráðleggingu/ráðgjöf um að ráðast eða ráðast ekki í tiltekna fjárfestingu eða tilboð um að kaupa, selja eða skrá sig fyrir tilteknum fjármálagerningum.