Hentugur fjárfestingartími 2 ár+

Góð dreifing á ríkisskuldabréfamarkaði

Sjóður 5 - ríkisskuldabréf er verðbréfasjóður sem fjárfestir eingöngu í skuldabréfum með ábyrgð ríkissjóðs.

Dreifing á milli verðtryggðra og óverðtryggðra ríkisbréfa með mislangan líftíma er góð leið til langtímasparnaðar. Hentar fjárfestingum til 2 ára eða lengur.

Helstu kostir

• Ríkisábyrgð eigna
• Ódýr leið á skuldabréfamarkað
• Virk stýring á skuldabréfamarkaði
• Ávallt laus til innlausnar með eins dags fyrirvara

Fjárfesta í sjóðiUpplýsingablað

Markmið sjóðsins

Langtímahækkun eigna með fjárfestingum í ríkisskuldabréfum, bæði verðtryggðum og óverðtryggðum.

Fyrir hvern er sjóðurinn?

Sjóður 5 hentar fjárfestum sem vilja ávaxta fé í tvö ár eða lengur og er mælt með því að sjóðurinn sé hluti af stærra verðbréfasafni. Meðaltími skuldabréfaeignar sjóðsins getur verið á bilinu 4 til 7 ár, þannig að gengi sjóðsins er næmt fyrir breytingum á ávöxtunarkröfu og getur lækkað tímabundið.

Fjárfestingarmarkmið

Eignir sjóðsins skulu ávaxtaðar í innlánum fjármálastofnana og skuldabréfum útgefnum af ríkissjóði, svo sem ríkisbréfum, spariskírteinum, ríkisvíxlum eða skuldabréfum útgefnum af stofnunum ríkissjóðs, svo sem íbúðabréfum og húsbréfum Íbúðalánasjóðs. Sjóðnum er heimilt, skv. 2. mgr. 31. gr. laga nr. 30/2003, að eiga til skamms tíma allt að 10% í lausu fé séu markaðsaðstæður ekki heppilegar til fjárfestinga vegna fjár sem hefur fengist með sölu hlutdeildarskírteina eða vegna sölu eigna sjóðsins. Framangreint fé er ekki hluti af fjárfestingarstefnu sjóðsins. Jafnframt er sjóðnum heimilt skv. 2. mgr. 40. gr laga nr. 30/2003 að taka skammtímalán til að mæta innlausnum. Slík lán mega ekki nema meira en 10% af heildareignum sjóðsins. Sjóðnum er einnig heimilt að fjárfesta í fjármálagerningum tengdum skuldabréfum, þ.e. afleiðum, en að hámarki 10% af heildareignum.

Almennar upplýsingar

Almennur fyrirvari

Skattlagning
Skattlagning hlutdeildarskírteina fer eftir lögum um tekjuskatt nr. 90/2003 og lögum um staðgreiðslu skatts á fjármagnstekjur nr. 94/1996. Skv. breytingu á lögum 94/1996 með bráðabirgðaákvæði í lögum 70/2009 ber að greiða 15% fjármagnstekjuskatt af jákvæðum mismun söluverðs hlutdeildarskírteinis að frádregnu kaupverði og þóknun frá 1. júlí 2009 til 31. desember 2009. Frá 1. janúar 2010 ber að greiða 18% fjármagnstekjuskatt af jákvæðum mismun söluverðs hlutdeildarskírteinis að frádregnu kaupverði og þóknun.

Fjárfesting í afleiðum
Sjóðnum er heimilt að nota afleiður til að fastsetja hagnað eða til að draga úr áhættu, eða til að festa verð á skuldabréfum vegna fyrirsjáanlegra innlausna eða til að bregðast við markaðsaðstæðum, enda sé það hluti af fjárfestingarstefnu sjóðsins. Fjárfestum er bent á nánari útskýringar á beitingu afleiðna er að finna í útboðslýsingu sjóðsins.

Fjárfestingu í verðbréfasjóðum fylgir ávallt fjárhagsleg áhætta. Eignarhlutdeild í verðbréfasjóði getur rýrnað, aukist eða staðið í stað og ber m.a. að hafa í huga áhættu vegna efnahagsástands, alþjóðlegra fjárfestinga auk gengisflökts gjaldmiðla þegar eignir sjóðs eru í erlendum gjaldmiðlum. Bent skal á að ávöxtun í fortíð er hvorki vísbending um né trygging fyrir ávöxtun í framtíð. Fjárfestingarmarkmið og fjárhagsstaða fjárfesta eru mismunandi. Þeim aðilum sem hafa hug á viðskiptum er bent á að leita sér sérfræðilegrar ráðgjafar og kynna sér vel hina ýmsu fjárfestingakosti sem í boði eru. Fjárfestar eru hvattir til að kynna sér útboðslýsingu sjóðsins, sérstaklega umfjöllun um áhættur, sjá nánar undir Ítarefni hér að ofan.

Gengisþróun og ávöxtun
Í línuriti gengisþróunar er birt gengi viðkomandi sjóðs sl. eitt ár. Ef sjóður er ekki orðinn ársgamall er birt gengissaga frá stofnun hans. Nafnávöxtun tímabila sem eru styttri en eitt ár er ekki reiknuð upp á ársgrundvöll heldur er þar um gengisbreytingu að ræða. Nafnávöxtun tímabila sem ná yfir eitt ár og meira er reiknuð yfir á ársgrundvöll. Uppreikningur ávöxtunar miðast ávallt við síðasta skráða gengi og er í grunnmynt hvers sjóðs.

Tekið skal fram að umfjöllun þessi er aðeins birt í upplýsingaskyni og skal því ekki litið á hana sem ráðleggingu/ráðgjöf um að ráðast eða ráðast ekki í tiltekna fjárfestingu eða tilboð um að kaupa, selja eða skrá sig fyrir tilteknum fjármálagerningum.