Hentugur fjárfestingartími er 5 ár +

Fjárfestingarsjóður

Fjárfestir í hlutabréfum skráðum í Kauphöll Íslands eða öðrum fjármálagerningum tengdum hlutabréfum.

Fjárfesta í sjóði Upplýsingablað

Markmið sjóðsins

Markmið sjóðsins er langtíma hækkun eigna með fjárfestingum í hlutabréfum skráðum í Kauphöll Íslands (Nasdaq Omx Nordic Exchange) eða öðrum fjármálagerningum tengdum hlutabréfum. Stefnt er að því að ná hærri ávöxtun en vísitala aðallista með arði sem reiknuð er út af Kauphöll Íslands (OMXIGI).

Fyrir hvern er sjóðurinn?

Sjóður 10 hentar fjárfestum sem vilja ávaxta fé í fimm ár eða lengur. Mælt er með því að sjóðurinn sé hluti af stærra verðbréfasafni. Sveiflur í gengi sjóðsins geta verið miklar og niðursveiflur á hlutabréfamörkuðum langar.

Fjárfestingarmarkmið

Sjóðurinn leitast við að fjárfesta í traustum fyrirtækjum sem eru líklegust að skila sem bestri ávöxtun að mati sjóðstjóra. Til þess að auka vænta ávöxtun er fjárfest í mjög fáum félögum hverju sinni sem hefur þau áhrif að áhættudreifing verður minni en ef fjárfest er í dreifðara safni hlutabréfa.

Sjóðnum er heimilt að eiga að hámarki 50% af heildareignum í innlánum fjármálafyrirtækja séu markaðsaðstæður til fjárfestinga í hlutabréfum ekki hagstæðar að mati sjóðstjóra. Þá er sjóðnum einnig heimilt að fjárfesta í óskráðum innlendum hlutafélögum, þó að hámarki 30% af heildareignum, enda sé það yfirlýst stefna fyrirtækis að sótt verði um skráningu innan tveggja ára. Sjóðnum er einnig heimilt að fjárfesta í afleiðum að hámarki 10% af heildareignum, en er óheimilt að taka lán til að fjárfesta í hlutabréfum og skortselja fjármálagerninga.

Fjárfestingarsjóður

Sjóður 10 – úrval innlendra hlutabréfa er fjárfestingarsjóður skv. III. kafla laga nr. 30/2003, um verðbréfasjóði og fjárfestingarsjóði og hefur sem slíkur eingöngu heimild til markaðssetningar á Íslandi. Munurinn á fjárfestingarsjóði og verðbréfasjóði, sem heimilt er að markaðssetja á EES og sem sækir fjárfestingarheimildir sínar til II. kafla sömu laga er einkum sá að heimildir fjárfestingarsjóða til fjárfestinga eru ekki háðar eins miklum takmörkunum og heimildir verðbréfasjóða. Þrátt fyrir rýmri heimildir fjárfestingarsjóða til fjárfestinga mun Sjóður 10 eingöngu nýta heimildir 2. tl. 54. gr. og 3. tl. 54. gr. laga nr. 30/2003, þ.e. auknar heimildir til fjárfestinga í óskráðum hlutafélögum og aukið svigrúm til fjárfestinga í einstökum útgefendum. Að öðru leyti fer um fjárfestingar sjóðsdeildarinnar eftir II. kafla F í lögunum. Aukin áhætta sjóðsins sem fjárfestingarsjóðs mun því felast í minni áhættudreifingu heldur en gildir um verðbréfasjóði og rýmri heimildum til að fjárfesta í óskráðum hlutabréfum.

Almennar upplýsingar

Almennur fyrirvari

Skattlagning
Skattlagning hlutdeildarskírteina fer eftir lögum um tekjuskatt nr. 90/2003 og lögum um staðgreiðslu skatts á fjármagnstekjur nr. 94/1996. Skv. breytingu á lögum 94/1996 með bráðabirgðaákvæði í lögum 70/2009 ber að greiða 15% fjármagnstekjuskatt af jákvæðum mismun söluverðs hlutdeildarskírteinis að frádregnu kaupverði og þóknun frá 1. júlí 2009 til 31. desember 2009. Frá 1. janúar 2010 ber að greiða 18% fjármagnstekjuskatt af jákvæðum mismun söluverðs hlutdeildarskírteinis að frádregnu kaupverði og þóknun.

Fjárfesting í afleiðum
Sjóðnum er heimilt að nota afleiður til að fastsetja hagnað eða til að draga úr áhættu, eða til að festa verð á skuldabréfum vegna fyrirsjáanlegra innlausna eða til að bregðast við markaðsaðstæðum, enda sé það hluti af fjárfestingarstefnu sjóðsins. Fjárfestum er bent á nánari útskýringar á beitingu afleiðna er að finna í útboðslýsingu sjóðsins.

Fjárfestingu í verðbréfasjóðum fylgir ávallt fjárhagsleg áhætta. Eignarhlutdeild í verðbréfasjóði getur rýrnað, aukist eða staðið í stað og ber m.a. að hafa í huga áhættu vegna efnahagsástands, alþjóðlegra fjárfestinga auk gengisflökts gjaldmiðla þegar eignir sjóðs eru í erlendum gjaldmiðlum. Bent skal á að ávöxtun í fortíð er hvorki vísbending um né trygging fyrir ávöxtun í framtíð. Fjárfestingarmarkmið og fjárhagsstaða fjárfesta eru mismunandi. Þeim aðilum sem hafa hug á viðskiptum er bent á að leita sér sérfræðilegrar ráðgjafar og kynna sér vel hina ýmsu fjárfestingakosti sem í boði eru. Fjárfestar eru hvattir til að kynna sér útboðslýsingu sjóðsins, sérstaklega umfjöllun um áhættur, sjá nánar undir Ítarefni hér að ofan.

Gengisþróun og ávöxtun
Í línuriti gengisþróunar er birt gengi viðkomandi sjóðs sl. eitt ár. Ef sjóður er ekki orðinn ársgamall er birt gengissaga frá stofnun hans. Nafnávöxtun tímabila sem eru styttri en eitt ár er ekki reiknuð upp á ársgrundvöll heldur er þar um gengisbreytingu að ræða. Nafnávöxtun tímabila sem ná yfir eitt ár og meira er reiknuð yfir á ársgrundvöll. Uppreikningur ávöxtunar miðast ávallt við síðasta skráða gengi og er í grunnmynt hvers sjóðs.

Tekið skal fram að umfjöllun þessi er aðeins birt í upplýsingaskyni og skal því ekki litið á hana sem ráðleggingu/ráðgjöf um að ráðast eða ráðast ekki í tiltekna fjárfestingu eða tilboð um að kaupa, selja eða skrá sig fyrir tilteknum fjármálagerningum.