Verðbréf og áhætta
Verðbréf og áhætta fjallar um ávöxtun peninga í verðbréfum. Bókina má líta á sem sjálfstætt framhald af Fjármálahandbók VÍB sem fjallaði almennt um fjármál einstaklinga og fjölskyldna og uppbyggingu á eignum en kom lítið inn á ávöxtun peninga.
Í bókinni er fjallað um mismunandi tegundir verðbréfa, verðbréfasjóði og erlenda sem innlenda markaði en þungamiðja bókarinnar felst í umfjöllun um ávöxtun og áhættu og hvernig þessir tveir þættir mynda saman grunninn að ávöxtun fjármuna almennt.
Kafli 1. Skuldabréf
Skuldabréf eru mikilvægasti flokkur verðbréfa hvar sem er í heiminum. Markaðsvextir hvers lands mótast í viðskiptum með skuldabréf í samræmi við lögmál framboðs og eftirspurnar og er í kaflanum farið yfir hvernig markaðsvextir mótast. Annað mikilvægt atriði sem fjallað er um er hvernig þessir markaðsvextir hafa áhrif á verðmæti skuldabréfanna sjálfra en þessar gengisbreytingar valda áhættu við kaup skuldabréfa.
Kafli 2. Hlutabréf
Sérstakur ævintýraljómi hefur löngum leikið um hlutabréf, jafnt hér á landi sem erlendis. Breytingar á hlutabréfaverði vekja oft mikla athygli og geta dregið dilk á eftir sér. Hver hefur ekki heyrt um hrunið á Wall Street árið 1929 og heimskreppuna sem fylgdi í kjölfarið? Ávöxtun hlutabréfa er oft háð mikilli óvissu og fjallað er um orsakir þess í kaflanum sem og hvaða þættir hafa áhrif á verð hlutabréfa.
Kafli 3. Hvernig á að meta áhættu?
Í þessum kafla er rætt um muninn á fyrirtækjaáhættu og markaðsáhættu, fjallað um hvernig mæla má áhættu. Nokkur mikilvæg hugtök verða kynnt s.s. staðalfrávik og betagildi og íhugað hvernig fjárfestar geta dregið úr áhættu.
Kafli 4. Að vega saman ávöxtun og áhættu
Hagfræðingurinn Harry Markowitz sýndi fram á hvernig hægt er að velja saman safn verðbréfa þannig að sem hæst ávöxtun náist með sem minnstri áhættu náist. Það er því ekki að undra að Markowitz fékk Nóbelsverðlaunin fyrir framtakið. Í kaflanum eru kenningar Markowitz útskýrðar og nokkur mikilvæg hugtök kynnt, s.s. skilvirkt hlutabréfasafn, framlína, markaðslína og samvik.
Kafli 5. Erlend verðbréf
Sá sem aðeins ávaxtar sparifé sitt heima á Íslandi verður af 99,9% fjárfestingarmöguleika í heiminum og gullnum tækifærum til að dreifa áhættu og fá eitthvað fyrir ekkert. Í kaflanum er fjallað um hvernig megi auka ávöxtun og minnka áhættu með fjárfestingum í erlendum verðbréfum til viðbótar við íslensk. Rætt er um hvernig viðskipti með erlend verðbréf fara fram og áhrifaþætti á ávöxtun þeirra.
Kafli 6. Verðbréfasjóðir
Óhætt er að fullyrða að verðbréfasjóðir eru besti kosturinn fyrir fjölmarga sparifjáreigendur með tilheyrandi áhættudreifingu og ávöxtun. Í kaflanum eru kynntar hinar fjölmörgu tegundir verðbréfasjóða, munurinn á hlutdeilarskírteini, skuldabréfi og hlutabréfi verður útskýrður, fjallað verður um hvernig eftirliti með verðbréfasjóðum er háttað og rætt hvernig gengi þeirra er reiknað.
Kafli 7. Hvernig er best að ávaxta peninga?
Hér eru settar fram þrjár aðferðir sem einstaklingar geta beitt við ávöxtun sparifjár og byggjast þær á aldri einstaklings, viðhorfi til áhættu og markmiði með sparnaði. Aðferðirnar þrjár eru svo sameinaðar í eina sem gera ætti öllum kleift að eignast sparifé og ávaxta það á árangursríkan hátt.
Aðrir tenglar
Adobe Reader
Til að opna pdf skjöl þarf Adobe Reader sem má sækja frítt af vef Adobe.
