Greiðslufyrirmæli

Íslandsbanki á Nostro reikning hjá tveimur alþjóðlegum böknum, JP Morgan Chase og Svenska Handelsbanken fyrir alla helstu gjaldmiðla.

SWIFT kóði bankans er GLITISRE og skal hann notaður við greiðslufyrirmæli.

Þann 30. apríl 2010 setti Seðlabanki Íslands nýjar reglur um gjaldeyrismál nr. 270/2010. Reglurnar byggja á eldri reglum seðlabanks nr. 880/2009 og 1130/2008. Markmið reglnanna er að takmarka eða stöðva tímabundið tiltekna flokka fjármagnshreyfinga og gjaldeyrisviðskipti sem þeim tengjast til og frá landinu sem valda að mati Seðlabanka Íslands alvarlegum og verulegum óstöðugleika í gengis- og peningamálum.

Eftirfarandi atriði er vert að hafa í huga:

Sala á gjaldeyri

• Einstaklingur sem er innlendur aðili, hefur heimild til að kaupa erlendan gjaldeyri hjá fjármálafyrirtæki hér á landi, þar sem hann er með viðskipti sín, fyrir allt að jafnvirði 350.000 kr. í reiðufé í hverjum almanaksmánuði gegn framvísun á farseðli.
• Innlendum aðila er heimilt að taka út af erlendum gjaldeyrisreikningi hjá fjármálafyrirtæki hér á landi, að jafnvirði 350.000 kr. í reiðufé í hverjum almanaksmánuði gegn framvísun á farseðli.
• Þá hefur einstaklingur, sem er erlendur aðili og staddur hér á landi tímabundið vegna ferðalaga heimild til að kaupa erlendan gjaldeyri hjá fjármálafyrirtæki hér á landi, fyrir allt að jafnvirði 350.000 kr. í reiðufé gegn framvísun á farseðli.
• Heimild einstaklinga til að kaupa erlendan gjaldeyri vegna ferðalaga er miðuð við að gjaldeyririnn sé keyptur í eigin viðskiptabanka gegn framvísun á farseðli í eigin nafni aðilans.

Gjafir og styrkir

• Fjármagnshreyfingar á milli landa vegna gjafa innlendra aðila til einstaklinga og styrkja til góðgerðasamtaka eða hliðstæðra aðila og aðrar sambærilegar hreyfingar fjármagns á milli landa umfram 3.000.000 kr. á almanaksárinu eru óheimilar.

Laun og framfærsla

• Einstakling sem er erlendur aðili er heimilt að flytja út erlendan gjaldeyri fyrir allt að jafnvirði 3.000.000 kr. á almanaksárinu ef sýnt er fram á að notkun fjárins sé vegna eigin framfærslu.
• Laun sem erlendur aðili hefur aflað hérlendis sl. 6 mánuði eru undanþegin reglunum.

Kaup á fasteign og lausafé

• Fjármagnshreyfingar á milli landa vegna fasteignaviðskipta erlendis eru óheimilar nema synt sé fram á að viðskiptin séu gerð vegna búferlaflutninga aðila. Aðilar verða að framvísa undirrituðum kaupsamningi og staðfestingu á búferlaflutningum frá Þjóðskrá.
• Fjármagnshreyfingar á milli landa vegna fjárfestingar í öðrum eignum í erlendum gjaldeyri, þ.m.t. hrávöru, faratækjum og vinnuvélum, sem eru hvorki eðlilegur þáttur í atvinnustarfsemi aðila né ætluð til innflutnings fyrir framleiðslu hans, eru óheimilar.

Fjárfesting og viðskipti með fjármálagerninga

• Fjárfesting í verðbréfum, hlutdeildaskírteinum verðbréfa og fjárfestingasjóða, peningamarkaðsskjölum eða öðrum framseljanlegum fjármálagerningum útgefnum í erlendum gjaldeyri er óheimil. Þó er aðilum sem fjárfest hafa í slíkum fjármálagerningum fyrir 28. nóvember 2008 heimilt að endurfjárfesta.

Nýfjárfestingar

• Innlend nýfjárfesting er ótakmörkuð. Nýfjárfesting er fjárfesting sem gerð er eftir gildistöku reglnanna fyrir nýtt innstreymi erlends gjaldeyris, sem skipt er í innlendan gjaldeyri hjá fjármálafyrirtæki hér á landi. Afleiðusamningar teljast ekki til nýfjárfestingar.

Starfsfólk Íslandsbanka er skylt að fara að reglum Seðlabanka Íslands um gjaldeyrismál.  Vinsamlegast  farið ekki fram á annað.