Skilmálar

A - Almennt um debetkort

Aðilar þessara skilmála eru korthafi, sem með umsókn sinni hefur samþykkt þá, viðkomandi greiðslukortafyrirtæki og Íslandsbanki hf. sem útgefandi kortsins. Þegar korthafi og reikningshafi eru ekki sami aðili gilda reglur þessar og skilmálar einnig fyrir reikningshafa.
Debetkort má nota á ferns konar hátt:
- sem alþjóðlegt greiðslukort til kaupa á vöru og þjónustu.
- sem hraðbankakort til úttektar á reiðufé í hraðbanka.
- sem tékkaábyrgðarkort til framvísunar við greiðslu með tékka.
- sem bankakort til úttektar eða greiðslu í banka/sparisjóði.
3.1 Debetkort eru auðkennd með nafni Íslandsbanka sem gefur þau út. Þau eru ýmist ELECTRON (VISA) eða MAESTRO/CIRRUS (MasterCard) kort og eru eign bankans.
3.2 Sýnishorn af rithönd korthafa verður myndað inn á kortið og hefur hann einn heimild til að nota það, þar sem um það hefur verið samið samkvæmt þessum skilmálum og öðrum reglum sem um það gilda á hverjum tíma.
3.3 Útgefandi debetkorts getur stöðvað notkun þess og innkallað það án fyrirvara, komi til misnotkunar á því eða brota korthafa á reglum og skilmálum um kortið, að mati útgefanda.
3.4 Debetkort er einungis unnt að nota með lestri upplýsinga af segulrönd þess á rafrænan hátt. Þess vegna er óheimilt að gefa upp númer kortsins eða leyninúmer þess til greiðslu án rafrænnar notkunar þess. Kortið gildir því ekki til greiðslu símleiðis eða bréflega.
Greiðslukortafyrirtækin Greiðslumiðlun hf. – VISA Ísland og MasterCard – Kreditkort hf., auk Reiknistofu bankanna (RB), annast ýmsa þætti debetkortaþjónustu fyrir bankann samkvæmt samningum sín í milli.
5.1 Umsókn um debetkort, ásamt mynd og rithandarsýnishorni væntanlegs korthafa, skal afhent í bankanum. Áður ber umsækjanda að kynna sér vandlega þessar reglur og skilmála.
5.2 Korthafi/reikningshafi getur sótt um aukakort á nafni annars aðila, en ber þá fulla ábyrgð á notkun þess sem sínu eigin.
5.3 Með undirritun umsóknar samþykkir korthafi öll ákvæði þessara reglna og skilmála um notkun debetkorts svo og bókunaraðferðir bankans.
6.1 Debetkort er verðmæti sem skal gæta eins og peninga eða tékka.
6.2 Korthafi ábyrgist að varðveita kortið og leyninúmer þess, þannig að enginn annar en hann geti notað það.
6.3 Korthafi skuldbindur sig til:
a. að eyðileggja umslag og miða með leyninúmeri um leið og hann hefur móttekið og lært leyninúmerið eða skráð það á öðrum stað.
b. að, ef leyninúmerið er skráð, gefa þá ekki til kynna að um sé að ræða leyninúmer vegna debetkorts.
c. að gefa engum upp leyninúmerið, skrá það ekki á debetkortið og geyma ekki upplýsingar um leyninúmerið í sömu hirslu og debetkortið.
6.4 Korthafi ber ábyrgð á öllum greiðslum/úttektum með debetkortum hans, sbr. þó greinar 10.2., 13.1. og 13.2.
6.5 Aukakorthafi ber ábyrgð á greiðslum/úttektum á sama hátt og aðalkorthafi.
6.6 Korthafi ábyrgist tjón gagnvart bankanum, sem verður vegna vanrækslu hans við vörslu eða notkun debetkorts eða leyninúmers þess, sbr. grein 10.2.
6.7 Korthafa er skylt að tilkynna aðsetursskipti til bankans til að tryggja að reikningsyfirlit og aðrar upplýsingar berist honum með eðlilegum hætti.
7.1 Debetkort er tengt viðskiptareikningi korthafa í bankanum. Heimild til greiðslu/ úttektar með því takmarkast við þá fjárhæð sem er til ráðstöfunar á viðkomandi reikningi þegar kort er notað.
7.2 Korthafi skuldbindur sig til að eiga ávallt næga innstæðu eða yfirdráttarheimild fyrir hverri greiðslu/úttekt af þeim reikningi sem kortið er tengt. Hann ábyrgist að fara ekki yfir ráðstöfunarfjárhæð sína með notkun kortsins.
7.3 Útgefendur debetkorta eru ekki ábyrgir fyrir tjóni, sem verður vegna lagaboða, aðgerða stjórnvalda, náttúruhamfara, stríðs, verkfalls, verkbanns, skæruverkfalla eða annarra slíkra aðstæðna, rafmagnstruflana eða rafmagnsleysis, né vegna truflana í símkerfi eða öðrum boðleiðum eða samgöngum.
7.4 Útgefendur debetkorta eru ekki ábyrgir fyrir tjóni né óhagræði, sem verður vegna þess að móttöku debetkorts er hafnað sem greiðslu hjá söluaðila eða í sjálfsafgreiðslutæki, né öðrum skaða, sem leitt getur þar af, sbr. þó greinar 13.1. og 13.2.
Bankinn ákveður gildistíma debetkortsins og er hann skráður á kortið hverju sinni.
9.1 Notkun debetkorts erlendis er heimil þar sem merki MAESTRO/CIRRUS (Master- Card) eða ELECTRON (VISA) er uppi.
9.2 Úttektir eru millifærðar erlendis frá í gjaldmiðli viðkomandi lands og umreiknaðar í íslenskar krónur á gengi bankans á færsludegi, ásamt kostnaði.
10.1 Glatist debetkort ber korthafa tafarlaust að tilkynna það til bankans eða næsta umboðsaðila MasterCard eða VISA, hvar sem er í heiminum. Korthafi á rétt á að fá staðfestingu á að hann hafi sinnt tilkynningaskyldu sinni. Sé tilkynning gefin símleiðis, skal korthafi staðfesta hana skriflega innan viku. Þegar skrifleg yfirlýsing þar um hefur borist, getur korthafi fengið útgefið nýtt debetkort sér til handa.
10.2 Sjálfsábyrgð korthafa takmarkast við jafnvirði EUR 150 í íslenskum krónum, ef kort hans er notað af óviðkomandi aðila, áður en hvarf þess er tilkynnt. Þetta á ekki við ef um stórfellt gáleysi eða svik af hálfu korthafa hefur verið að ræða. Tilkynningaskyldu ber að fullnægja svo fljótt sem verða má eftir að hvarf korts uppgötvast.
10.3 Glati korthafi debetkorti sínu erlendis býðst honum neyðarkort eða neyðarfé fyrir milligöngu MasterCard og VISA. Kostnaður vegna þessarar þjónustu skuldfærist á bankareikning korthafa skv. verðskrá.
10.4 Finni korthafi síðar kort, sem tilkynnt hefur verið glatað, er honum ekki heimilt að nota það. Tilkynna ber bankanum, Greiðslumiðlun hf. – VISA Ísland eða MasterCard – Kreditkorti hf. endurheimtuna og senda kortið sundurklippt til baka.
11.1 Gjöld vegna notkunar debetkorts greiðir korthafi samkvæmt verðskrá á hverjum tíma. Verðskrá, sem veitir upplýsingar um gjöld, vaxtakjör og annað, sem tengist notkun debetkorta, skal jafnan liggja frammi í bankanum.
11.2 Bankanum er heimilt að færa korthafa til gjalda á viðskiptareikning hans gjöld skv. verðskrá, sbr. grein 11.1.
11.3 Korthafi heimilar endurnýjun kortsins áður en gildistíminn rennur út, nema fyrirmæli berist um annað.
12.1 Debetkortið er ávallt eign bankans og getur hann afturkallað það fyrirvaralaust, ef um misnotkun eða vanskil er að ræða hjá korthafa.
12.2 Bankinn hefur heimild til að skrá öll afturkölluð kort og miðla þeim upplýsingum til seljenda vöru og þjónustu. Ef seljandi óskar þess að korthafi skili eftirlýstu korti, ber honum að afhenda það.
12.3 Ef bankinn neyðist til að ógilda kort vegna misnotkunar, er áskilinn réttur til að setja upplýsingar þar um á lokunarskrá banka og sparisjóða og varðveita þar.
12.4 Korthafa er óheimilt að nota debetkortið eftir að gildistími þess rennur út eða hafi það verið ógilt. Misnotkun kortsins varðar við lög sbr. m.a. 249. gr. almennra hegningarlaga nr. 19/1940.
13.1 Telji korthafi að hann hafi orðið fyrir skaða vegna tæknilegrar bilunar í hraðbanka eða öðrum sjálfsafgreiðslutækjum, þá ber bankanum fyrir hönd viðkomandi sölueða þjónustuaðila að færa fram fullgild rök fyrir því að búnaðurinn hafi starfað rétt þegar umrædd viðskipti fóru fram, eða er ella ábyrgur fyrir tjóninu.
13.2 Ábyrgð bankans takmarkast við beint fjárhagslegt tjón korthafa, en nær ekki til annars skaða eða óþæginda, sem leitt geta af bilun sjálfsafgreiðslubúnaðar. Bankinn ábyrgist ekki tjón þegar tæknibilun á að vera korthafa ljós, svo sem þegar skilaboð þess efnis koma fram á tölvuskjá.
14.1 Bankinn áskilur sér rétt til að breyta notkunarreglum þessum og skilmálum, enda séu þær breytingar tilkynntar korthafa með minnst 15 daga fyrirvara. Í tilkynningu um breytta skilmála skal vakin athygli á því í hverju breytingarnar felist og á rétti korthafa til að segja samningi upp. Noti korthafi kort sitt eftir að breyttir skilmálar hafa tekið gildi, telst hann samþykkur breytingunni.
14.2 Vilji korthafi segja kortinu upp skal hann tilkynna það skriflega til bankans og skila kortinu sundurklipptu.
15.1 Öll mál, sem rísa kunna af notkun kortsins, skulu, nema á annan veg sé samið, fara eftir íslenskum lögum. Korthafi samþykkir auk þess að bankinn megi reka innheimtumál í því landi þar sem korthafi hefur búsetu hverju sinni.
15.2 Rísi mál vegna brota á skilmálum þessum má reka það fyrir Héraðsdómi Reykjavíkur.

B - Debetkort sem greiðslukort

Þegar korthafi greiðir fyrir vöru eða þjónustu með debetkorti sínu og undirritar kaupnótu eða notar leyninúmer (PIN) vegna þeirra viðskipta, þá staðfestir hann að næg ráðstöfunarfjárhæð sé á reikningi sínum og samþykkir þar með, að sú upphæð sé tekin út af honum, samkvæmt færslu og bókunaraðferðum bankans.
Korthafi fær afhent eintak sölunótu við notkun kortsins, en annað eintak er varðveitt hjá seljanda. Færsluboð eru send þaðan rafrænt til uppgjörs hjá banka/sparisjóði/ seljanda og korthafa. Upplýsingarnar um viðskiptin geymast í bókhaldi þessara aðila og verða ekki látnar öðrum í té, nema vegna rannsóknar opinberra mála, sé þeirra krafist.
Sérhver ágreiningur eða tjón vegna kaupa á vöru eða þjónustu, sem greidd er með debetkorti, er útgefanda þess algerlega óviðkomandi og án ábyrgðar fyrir hann.
Bankanum er heimilt að skuldfæra viðskiptareikning korthafa fyrir úttekt hans með debetkorti, miðað við útgáfudag/dagsetningu kaupnótu. Úttektir eru að jafnaði færðar samdægurs á reikning korthafa. Korthafi getur ekki afturkallað greiðslu, sem hann innir af hendi með debetkorti sínu.
Greiðslur með debetkorti koma fram á reikningsyfirliti þess viðskiptareiknings sem kortið er tengt og korthafi fær sent frá bankanum með umsömdu millibili. Á yfirlitinu kemur fram nafn seljanda, þar sem kortið var notað, ásamt dagsetningu og upphæð. Ef um erlend viðskipti er að ræða kemur einnig fram upphæð kauplandsins. Ef korthafi hefur athugasemdir við reikningsyfirlit sitt, ber honum að tilkynna það bankanum innan 20 daga frá móttöku þess. Í vafatilvikum hvílir sönnunarbyrðin á kortaútgefanda.

C - Debetkort sem tékkaábyrgðarkort

Ef debetkort er tengt tékkareikningi tekur reikningsbanki ábyrgð á tékkum korthafa sem eru ekki hærri en tiltekin ábyrgðarfjárhæð samkvæmt eftirfarandi skilyrðum:

Ábyrgð reikningsbanka nær til tékka, sem móttakandi hefur tekið við sem greiðslu frá útgefanda tékkans í góðri trú og innleysir sjálfur hjá banka eða sparisjóði.
Útgefandi tékka skal við útgáfu hans framvísa debetkorti sem útgefið er til hans af sama banka/sparisjóði og tékkinn er gefinn út á.
Móttakanda tékka ber að gæta þess að undirskrift á tékka sé í samræmi við undirskrift á debetkorti, bera saman mynd á korti við þann sem framvísar því og skrá númer kortsins inn á tékkann undir undirskrift útgefandans. Jafnframt ber móttakanda að fullvissa sig um að tékki sé rétt útfylltur.
Ábyrgðin nær ekki til tékka sem reynast útgefnir í samvinnu útgefanda og móttakanda tékka til að fara í kringum samkomulag þetta.
Breyting á ábyrgðarfjárhæð er auglýst hverju sinni.

D Debetkort í hraðbönkum

Þegar debetkortið er notað í hraðbönkum kemur innsláttur sérstaks leyninúmers (PIN-númer) í stað undirskriftar og skoðast notkunin á kortinu og leyninúmerinu sem kvittun korthafans til bankans fyrir úttekinni fjárhæð.
Bankinn ákvarðar þá þjónustu sem hraðbanki veitir á hverjum tíma og áskilur sér rétt til að auka hana eða minnka.
Bankinn áskilur sér rétt til að loka hraðbanka um stundarsakir, á meðan eftirlit eða önnur vinna við hann útheimtir að hann sé lokaður. Korthafi á ekki rétt á skaðbótum vegna tjóns sem hann kann að verða fyrir ef hraðbanki er tekinn úr notkun eða bilar.

E Debetkort til úttektar í banka/sparisjóði

Við peningaúttekt eða greiðslu í banka eða sparisjóði skal framvísa kortinu hjá gjaldkera. Afgreiðsla fer fram á rafrænan hátt og gilda um hana liðir B1, 2, 4 og 5 í reglum þessum.

Reglur um tékkaviðskipti

Tékkareikningseigandi skuldbindur sig til að:

Nota eingöngu þau tékkaeyðublöð sem verða afhent sérstaklega til ávísunar á viðkomandi tékkareikning.
Skrifa ekki annað reikningsnúmer á eyðublöðin en númer viðkomandi tékkareiknings.
Varðveita tékkhefti og einstök tékkaeyðublöð þannig að óviðkomandi geti ekki komist yfir þau.
Tilkynna Íslandsbanka strax ef tékkhefti eða tékkaeyðublöð glatast.
Afhenda Íslandsbanka öll ónotuð tékkaeyðublöð þegar reikningnum er lokað eða ef bankinn krefst þess af öðrum ástæðum.

Að öðrum kosti getur tékkareikningseigandi orðið ábyrgur gagnvart Íslandsbanka fyrir tjóni sem leiða kann af misnotkun tékkaeyðublaða. Sé innstæða ekki næg á tékkareikningnum fyrir útgefnum tékkum, getur það haft í för með sér refsiábyrgð lögum samkvæmt auk þess sem bankanum er þá heimilt að loka öllum öðrum tékkareikningum viðkomandi tékkareikningseiganda. Nafn tékkareikningseiganda kann einnig að birtast í sameiginlegri lokunarskrá banka og sparisjóða. Það sama á við um þá sem hafa úttektarheimild þegar um tékkareikninga félags eða fyrirtækis er að ræða. Jafnframt skuldbindur tékkareikningseigandi sig til að greiða gjöld vegna notkunar tékkareikningsins í samræmi við gildandi verðskrá Íslandsbanka á hverjum tíma, svo sem vegna innstæðulausra tékka og innstæðulausra debetkortafærslna, auk færslu- og kortagjalda, o.fl.

Reglur um yfirdráttarheimildir

Áskilið er að sá sem fær yfirdráttarheimild sé hvorki í vanskilum við bankann né hafi sýnt verulega vanrækslu með tékkareikning sinn. Lágmarks- og hámarksupphæð heimildar er háð ákvörðun bankans á hverjum tíma.
Allir sem fá laun, tryggingabætur eða aðrar reglubundnar greiðslur inn á reikning sinn og hafa verið a.m.k. þrjá mánuði í viðskiptum við bankann, geta sótt um yfirdráttarheimild.
Ef reikningseigandi vill fá upphæð heimildar breytt eða fella hana niður, þarf hann að sækja sérstaklega um það. Heimilt er að óska eftir hækkun/lækkun á yfirdráttarheimild með skriflegri beiðni, símtali, tölvupósti, símbréfi eða í netbanka. Reikningseigandi telst hafa samþykkt hækkun á yfirdráttarheimild með notkun sinni á reikningnum í kjölfar hækkunar heimildar.
Ef í ljós kemur að yfirdráttarheimild er misnotuð getur bankinn sagt henni upp fyrirvaralaust. Yfirdráttarheimild fellur sjálfkrafa niður ef reikningi er lokað vegna misnotkunar.
Reikningseigandi skuldbindur sig til að greiða viðskiptagjald (heimildargjald) og vexti vegna yfirdráttarins skv. vaxtaákvörðun bankans hverju sinni. Vextir reiknast á yfirdráttarstöðu hvers dags. Viðskiptagjald og vextir eru skuldfærðir á viðkomandi reikning síðasta dag hvers mánaðar. Í því sambandi ber tékkareikningseiganda að gæta þess sérstaklega að staða tékkareikningsins eftir skuldfærslu sé ávallt innan marka yfirdráttarheimildarinnar.
Ársvextir breytast samkvæmt ákvörðun Íslandsbanka á hverjum tíma.
Íslandsbanki áskilur sér rétt til að krefjast trygginga fyrir yfirdráttarheimildinni hvenær sem er. Hafi reikningseigandi lagt fram yfirlýsingu um sjálfskuldarábyrgð þriðja aðila til tryggingar yfirdráttarheimildinni og í ljós kemur að yfirlýsingin reynist gölluð eða ef ábyrgðinni er sagt upp, er bankanum heimilt að fella niður yfirdráttarheimildina og gjaldfella yfirdráttarskuldina ef reikningseigandi verður ekki við áskorun bankans um að afla trygginga sem bankinn telur fullnægjandi.
Útgáfa innstæðulausra tékka/tékka umfram yfirdráttarheimildir varðar lokun reikningsins með tilheyrandi tilkynningu til sameiginlegrar lokunarskrár banka og sparisjóða og getur haft í för með sér refsiábyrgð lögum samkvæmt, sbr. reglur um tékkaviðskipti.

Reglur um spariþjónustu Íslandsbanka

Spariþjónustan getur tengst öllum bókarlausum innlánsreikningum í Íslandsbanka.
Viðskiptamenn geta gert samkomulag við bankann um spariþjónustu, þ.e. reglulegan sparnað. Samkomulagið er gert til a.m.k. þriggja mánaða í upphafi. Viðskiptamaður getur hvenær sem er óskað eftir að hætta í spariþjónustunni.
Viðskiptamenn geta valið um að nota áður stofnaðan innlánsreikning sinn eða stofnað nýjan innlánsreikning til að leggja sparnað inn á.
Bankinn tekur að sér að millifæra af tékkareikningi eða af öðrum innlánsreikningi yfir á þann innlánsreikning sem sparnaður skal lagður inn á samkvæmt samkomulagi. Unnt er að semja um millifærslur vikulega, hálfsmánaðarlega, mánaðarlega og ársfjórðungslega.
Viðskiptamenn geta gert samkomulag við bankann um sparnað með boðgreiðslum af MasterCard og/eða VISA kreditkortum mánaðarlega, en greiða þá útlagðan kostnað við þær. Verði kort ógilt af einhverjum ástæðum fellur samkomulag um boðgreiðslur niður.
Ef ekki er til nægileg innstæða á viðkomandi innlánsreikningi þegar millifærsla á að fara fram samkvæmt samkomulagi um spariþjónustu, er bankanum heimilt að sleppa millifærslunni í það sinn. Komi það ítrekað fyrir að ekki sé til nægileg innstæða þegar millifærsla á að fara fram, er bankanum heimilt að líta svo á að samkomulag um spariþjónustu sé niður fallið.
Fari innlánsreikningur í skuld vegna millifærslu er bankanum heimilt að bakfæra millifærsluna án viðvörunar ásamt hugsanlegum kostnaði.
Viðskiptamenn geta hvenær sem er ákveðið að breyta sparnaðarupphæð. Jafnframt er unnt að sleppa einstökum millifærslum að ósk viðskiptamanna. Tilkynna þarf bankanum um breytingar á millifærslu með tveggja daga fyrirvara. Breytingar á sparnaði með boðgreiðslum af kreditkortum þarf að tilkynna bankanum fyrir 15. dag mánaðar. Viðskiptamaður telst hafa samþykkt breytingu á sparnaði, berist bankanum ekki athugasemd frá honum innan 15 daga frá því að breyting kemur til framkvæmda.

Reglur þessar eru háðar ákvörðun Íslandsbanka hverju sinni.