Efni og innihald greina endurspegla ekki mat eða skoðanir Íslandsbanka heldur einungis þeirra aðila sem þær skrifa.

Þrátt fyrir að innkoma námsmanna sé oft lítil á meðan á náminu stendur ættu námsmenn að reyna að vera vel meðvitaðir um sparnað. Það auðveldar þeim lífið í náminu og skilar sér líka til lengri tíma litið.

Auðvitað er það mjög jákvætt þegar námsmenn ná að komast í gegnum námið án þess að stofna til annarra skulda en við Lánasjóð íslenskra námsmanna. Með jákvæðu hugarfari og meðvitund um hvar sé hægt að spara mætti hins vegar gera enn betur og koma sér upp smá varasjóði.

Byrjaðu strax

Margir námsmenn hugsa með sér að það sé ekki tímabært að fara að huga að því að gera fjárhagsáætlun fyrr en að loknu námi. Þá gera flestir námsmenn ráð fyrir að fá vel borgaða vinnu sem muni duga til að standa straum af öllum útgjöldum.

Langflestir námsmenn á Íslandi komast í gegnum nám sitt án þess að lenda í alvarlegum fjárhagslegum erfiðleikum. Hins vegar er það sem dæmi töluvert algengt hjá bandarískum námsmönnum að þeir þurfi að hætta námi vegna kortaskulda sem þeir ráða ekki við að borga.

Námsmenn ættu að reyna að búa sem best um eigin fjárhag. Sem betur fer eru einungis fáir íslenskir námsmenn sem lenda í fjárhagslegum vandræðum meðan á námi stendur. Þeir sem hafa þurft að glíma við slíkt fara því miður ekki alltafa að huga að lausnum fyrr en fjárhagsleg staða er kominn í óefni.

Berðu ábyrgð á sjálfum þér

Námsmenn sem hefja háskólanám rétt upp úr tvítugu finnst oft ekki auðvelt að þurfa allt í einu að yfirgefa heimili foreldra sinna og fara að sjá fyrir sér sjálfir. Enda ansi mikið af nýjum hlutum sem þarf að huga að. Hvað hef ég efni á stórri íbúð? Get ég keypt mér bíl eða á ég að láta strætókort nægja?

Síðan eru hinir og þessir minni fjárhagslegir liðir eins og klæðnaður, skólabækur, kort í ræktina og margt fleira. Auðvitað er mjög gaman að vera að hefja nám og kynnast nýju fólki og allt annað sem námi fylgir. Það má þó ekki gleymast að hver og einn ber persónulega ábyrgð á sjálfum sér og námsmenn ættu að huga vel að eigin fjármálum.

Flestir námsmenn ná að skipuleggja fjármál sín sjálfir. Einnig leita margir aðstoðar hjá þjónustufulltrúum í bönkum sem bjóða upp á námsmannaþjónustu í útibúum sínum og í gegnum netið.

Fjármálafræðsla í boði

Þeir sem fá fyrirfram greidd námslán hjá sínum banka ættu að reyna að skipta þeim jafnt niður á mánuði og ekki breyta þeirri áætlun. Hægt er að sækja námskeið á vegum banka um fjármálafræðslu.

Íslandsbanki og Opni Háskólinn í Háskólanum í Reykjavík hafa að undanförnu verið með námskeið í fjármálafræðslu sem hafa notið mikilla vinsælda. Enda mjög mikilvægt viðfangsefni við núverandi efnahagsástand. Auk þess hóf Íslandsbanki nýverið samstarf við fyrirtækið Meniga. Meniga er vefur sem er sérhannaður til að aðstoða fólk við að stjórna heimilisfjármálunum og nýta peningana sína sem best.

Auðvelt að spara

Það sama gildir um námsmenn og aðra að fólk gerir sér stundum illa grein fyrir því hvað hlutirnir kosta. Að kaupa sér alltaf kaffibolla fyrir fyrstu kennslustund getur kostað allt að 6000 krónur á mánuði sem gerir 54 þúsund krónur yfir námsárið sem telst vera um níu mánuðir á Íslandi.

Einnig má sem dæmi spara sér töluverðan pening með því að hafa með sér nesti í skólann í stað þess að kaupa sér máltíð í hverju hádegi. Með því að taka með sér nesti má auðveldlega spara sér 10 til 15 þúsund krónur á mánuði.

Komdu upp bókhaldi

Grunnatriðin til að koma þessu í lag eru þau sömu hjá námsmönnum og öðrum. Skrifaðu niður hvað mánaðatekjurnar verða miklar yfir önnina. Ef þú hefur náð að leggja fyrir peninga eftir sumarvinnu reyndu þá að deila þeim jafnt yfir alla níu mánuðina sem námsárið stendur yfir.

Síðan er gott að skrifa niður í hvað þú eyðir og hveru mikið í hvern kostnaðarlið. Sumir koma sér upp matarkrukku þar sem sú upphæð sem á að fara í mat yfir mánuðinn er sett. Best er ef hægt er að deila upphæðinni í krukkunni jafnt niður á allar vikur. Ef eyðsla þín yfir mánuðinn er minni en útgjöld ertu í góðum málum.

Leggðu í sparnað

Námsmenn ættu að reyna að leggja eitthvað fyrir í hverjum mánuði. Fimm eða tíu þúsund krónur ætti að vera viðráðanlegt fyrir flesta. Fyrir þann pening er hægt að leggja í ýmis konar sparnað. Má þar nefna að bankarnir bjóða upp á fjölbreytt úrval sparnaðarreikninga. Bæði verðtryggða og óverðtryggða.

Einnig er hægt að fjárfesta í skuldabréfa eða hlutabréfasjóðum sem eigna- og lífeyrisþjónusta Íslandsbanka býður upp á. Það er auðvelt í framkvæmd. Lágmarkskaup eru yfirleitt 10 þúsund krónur og einnig er hægt að vera í reglulegri áskrift að sjóðum fyrir fimm þúsund krónum að lágmarki. Með því að hafa samband við þjónustufulltrúa er hægt að skrá sig í reglulegan sparnað. Netbanki Íslandsbanka býður líka viðskiptavinum sínum upp á að stunda viðskipti með hlutabréf og verðbréfasjóði í gegnum netið.

Hver er sinnar gæfu smiður

Hér hafa ýmis úrræði fyrir námsmenn verið rædd sem nýst geta þeim til að halda fjármálunum í lagi. Auðvitað hafa margir námsmenn þessa hluti á hreinu. Það væri þó óskandi að allir námsmenn reyndu að nýta sér eitthvað af því sem hér var farið yfir. Munið líka að hver er sinnar gæfu smiður.