Áramótaheit í kílóum og krónum

Efni og innihald greina endurspegla ekki mat eða skoðanir Íslandsbanka heldur einungis þeirra aðila sem þær skrifa.

Nú líður að þeim árstíma þegar fólk flykkist í æfingasalina til að tálga af sér aukakíló hátíðanna og kannski einhver fleiri, sem hafa verið að safnast utan á skrokkinn yfir lengri tíma. Sumir fara af stað því samviskubit vegna óhóflegrar neyslu í jólamánuðinum segir til sín, aðrir heita á sig um áramótin að fara í heilsuátak til frambúðar.  Hvað sem maður gerir sér til heilsubótar er mikilvægt að það henti manni og veiti ánægju annars er hætt við að maður verði styrktarmeðlimur einhverrar líkamsræktarstöðvarinnar.  En það er hægt að nota tímamótin til að huga að annars konar heilsu, fjárhagslegri heilsu. Greiðslukortareikningurinn hefur nefnilega tilhneigingu til að fitna með okkur á þessum árstíma og það er verðugt áramótaverkefni að taka til í útgjöldum heimilisins.

Greinum neysluna

Þau okkar sem halda ekki nákvæmt heimilisbókhald geta á einfaldan hátt greint neyslumunstrið um hver mánaðamót.  Greiðslukorta- og bankayfirlitin eru nægilega ýtarleg til þess að hægt sé að flokka útgjöldin í nokkra megin flokka, t.d. mat- og hreinlætisvöru, fatnað,  frístundir/skemmtanir og bensín.   Fylgjumst svo með hvort þessir flokkar taka breytingum milli mánaða og leitum skýringa.  Það getur líka verið athyglisvert að bera útgjöldin okkar saman við neysluviðmið Velferðarráðuneytisins og sjá hver frávikin eru, hvort þau eru bundin við einhverja ákveðna útgjaldaliði og skoða þá sérstaklega.  Reiknivél fyrir neysluviðmiðin eru á slóðinni velferdarraduneyti.is/neysluvidmid

Leitum að tækifærum til að minnka útgjöld

Það eru ótal tækifæri til að draga úr útgjöldum heimilisins án þess að minnka lífsgæðin.  Við þurfum  bara að átta okkur á því hvar hagstæðast er að versla.  Það er sáraukalítið að skera aðeins af stærstu útgjaldaliðunum því lítil prósentulækkun gefur okkur margar krónur. Matur og rekstrarkostnaður bifreiðar eru stórir liðir í heimilisútgjöldunum. Skoðið tilboðin hjá matvöruverslununum og fylgist með verðum bensínstöðvanna. Nýtið það sem þið kaupið.  Í stað þess að fóðra ruslaskrímslið á hálfu brauði á viku, skiptið brauðinu strax og þið kaupið það og setjið helminginn í frysti.  Geymið litla límmiða við ísskápinn og skellið miða með dagsetningu á dósir og krukkur sem þið opnið, svo þið hendið ekki mat af því þið vitið ekki hvað hann er gamall.  Svo er gott að ganga eða hjóla í vinnu og skóla og sameina þannig líkamlega og fjárhagslega heilsuátakið.

Notum reiknivélar á netinu og fáum tilboð

Á netinu er hægt að nálgast reiknivélar sem hjálpa manni að finna lægstu símagjöldin og hagstæðasta orkuverðið.

Reiknivél Póst- og fjarskiptastofnunar fyrir fjarskiptakostnað er á slóðinni reiknivel.is

Þar er hægt að bera saman verð símafyrirtækjanna á símgjöldum vegna heimilissíma, farsíma og nettengingar miðað við þá notkun sem hentar hverjum og einum.  Athugun leiðir í ljós að munurinn getur skipt þúsundum króna á mánuði.

Reiknivél Orkustofnunar fyrir raforkuverð er á slóðinni os.is/raforkuverd

Þar er hægt að finna hagstæðasta raforkuverð fyrir hvern og einn út frá staðsetningu og stærð húsnæðis og tegund upphitunar.  Raforkuverð fyrir litla íbúð á hitaveitusvæði er mjög svipað hjá öllum orkufyrirtækjunum, en það getur munað mörgum þúsundum á ári á ódýrasta og dýrasta rafmagninu ef verið er að rafhita stórt einbýlishús.

Hjá Orkuveitu Reykjavíkur á slóðinni or.is/Heimili/Reiknivelar/ getið þið reiknað út meðalnotkun á rafmagni og heitu vatni í húsnæði eins og ykkar og borið saman við ykkar reikninga. Á slóðinni er líka hægt að sjá orkunotkun einstakra heimilistækja.

Tryggingar heimilisins er útgjaldaliður sem er oft hægt að lækka verulega.  Gerið yfirlit yfir eignirnar sem á að tryggja og hvaða sjálfsáhættu þið viljið hafa og sendið tölvupóst á tryggingafélögin þar sem þið óskið eftir tilboði.

Festum góða siði í sessi

Það er gott að gera það að lífsstíl að hugsa vel um fjármálin, ekki síður en heilsuna og vera vakandi yfir því hvað maður gerir við peningana sem maður er búinn að hafa svo mikið fyrir að vinna sér inn. Njótum lífsins á nýju ári, hraust og áhyggjulaus.